Bayram kunlari O‘zbekistonda salqin ob-havo kutilmoqda

Sinoptiklarning ma’lumot berishicha, respublikadagi ob-havo sharoiti yaqinlashib kelayotgan dam olish va bayram kunlarida salqin bo‘lishi kutilmoqda.

O‘zgidromet xabariga ko‘ra, bugun kunduzi O‘zbekiston bo‘yicha bulutsiz va issiq ob-havo saqlanib turadi, havo harorati 36-39 daraja, cho‘l hududlarda va respublika janubida ba’zi joylarda 41 darajagacha bo‘ladi.

Ertadan boshlab respublika hududiga shimoli-g‘arbdan nisbatan salqin havo massalari kirib keladi.

Havo harorati asta-sekin pasayadi va 30 avgustda 31-36 daraja, 31 avgust va 1 sentyabrda 28-33 darajani tashkil etadi.

Kechasi va ertalab salqin havo sezilarli bo‘ladi, 1 sentyabrga kelib, harorat kechasi 13-16 darajagacha pasayadi.

Shu kunlarda respublika bo‘yicha bulutsiz va quruq ob-havo saqlanib turadi.

Respublika bo‘yicha ba’zi joylarda shamol tezligi 13-18 m/s gacha kuchayishi kutilmoqda, 30-31 avgust va 1 sentyabrda ayrim joylarda ba’zida 20-23 m/s gacha kuchayishi, chang-to‘zonlar bilan kuzatilishi mumkin.

Toshkentda havo bulutsiz bo‘ladi. Sharqiy shamol yo‘nalishini o‘zgartirib, shimoli-g‘arbdan 3-8 m/s tezlikda esadi, 30-31 avgustda 10-14 m/s gacha kuchayishi, ba’zi joylarda chang-to‘zonlar bilan kuzatilishi mumkin.

Bugun kunduzi harorat 37-39 daraja, shanba kuni 34-36 daraja, yakshanba va dushanba kunlari 30-32 daraja bo‘ladi. Harorat kechalari asta-sekin 13-15 darajagacha pasayadi.