Pedro Paskal Todd Xeynsning yangi loyihasida Xoakin Feniks o‘rnini egallaydi

“Fantastik to‘rtlik” yulduzi Pedro Paskal “May-dekabr” filmi rejissyori Todd Xeynsning yangi “De Noche” (“Tunda”) dramasida bosh rolni ijro etadi.

Dastlab filmda bosh rolni Xoakin Feniks o‘ynashi kerak edi, u film ssenariysining hammualliflaridan biri ham edi. Mish-mishlarga ko‘ra, Feniks loyihaning haddan tashqari ochiq-oydinligidan xijolat bo‘lib, o‘tgan yilning yozida, suratga olish boshlanishidan sal oldin loyihani tark etgan.

“Tunda” filmining syujeti 1930-yillarda Los-Anjeles va Meksikada ikki erkakning munosabatlari haqida hikoya qiladi. Paskal bilan birga Denni Ramires (“Kapitan Amerika 4”) ham rol ijro etadi.

Suratga olish ishlari Yangi yilgacha boshlanadi, aniq chiqish sanasi hali ma’lum emas. Paskal va Feniks yaqinda “Eddington” filmida birgalikda suratga tushishgandi.