Shahlo Ahmedova uzoq kutilgan “Habibi” taronasini taqdim etdi

Mashhur xonanda Shahlo Ahmedova yangi “Habibi” nomli qo‘shig‘ini muxlislariga havola etdi. Kompozitsiya san’atkorning rasmiy sahifalarida e’lon qilinib, qisqa fursatda tinglovchilar orasida katta qiziqish uyg‘otdi.

Qo‘shiq o‘zining zamonaviy ritmlari va Sharq ohanglarini uyg‘unlashtirgan uslubi bilan ajralib turadi. Shahlo Ahmedova “Habibi” orqali yozgi kayfiyatni eslatuvchi, raqsga chorlovchi quvnoq energiyani yetkazishni maqsad qilganini ta’kidlagan.

Xonanda Instagram sahifasida qo‘shiq bilan birga ishlangan raqs videosini ham e’lon qildi. Taqdim etilgan videoda Ahmedovaning sahnadagi ishonchli harakatlari va o‘ziga xos obraz yaratish mahorati muxlislar tomonidan iliq kutib olindi.

To‘laqonli klip hozircha e’lon qilinmagan bo‘lsa-da, ko‘plab foydalanuvchilar ushbu raqs videosini kelajakdagi klip uchun tizer yoki treyler bo‘lishi mumkin, deb taxmin qilmoqda. “Habibi” hozirda barcha yirik musiqiy platformalarda tinglash uchun taqdim etilgan.