Arzon va sifatli: interyerni ta’mirsiz va katta xarajatlarsiz qanday yangilash mumkin?
Interyer dizayni va kvartira/uyni ta’mirlaganda har doim shunday bo‘ladi: ishni bir boshlasangiz – to‘xtashning iloji yo‘q. Mavsumiylik yoki kayfiyatga qarab, xonani yangilashni, vaqtimizni ko‘p o‘tkazadigan joyga yangi hayot bag‘ishlashni istaymiz. Bu o‘rinda hamma narsa: detallar, funktsional va unchalik funksional bo‘lmagan – asosiysi, har bir kishining hayotini soddalashtiradigan narsalar ulkan ahamiyatga egadir.
Biz interyerni ta‘mirsiz, ham pul, ham vaqt borasida katta xarajatlarsiz qanday yangilash mumkinligini aniqlashga qaror qildik.
Asosiy e’tiborni devorlarga qaratamiz
Devorlarning rangini tubdan o‘zgartirish yoki gul qog‘ozlarni o‘zgartirishni tezda amalga oshirib bo‘lmaydi (ammo siz urinib ko‘rishingiz mumkin). Ammo biz vaqtni tejab, dekorativ yozuvlar, rasmlar, plakatlar va kollajlar yordamida interyerda jiddiy vizual o‘zgarishlarni amalga oshirishni taklif qilamiz.
Masalan, so‘nggi yillarda trendga aylangan motivatsion yozuvlar nafaqat samaradorlikni oshirishga yordam beradi, balki muhim qadriyatlar, shuningdek, orzularingiz va maqsadlaringizni eslatib turadi. Yoki yoqtirgan kitob yoki filmdagi sevimli iqtibosingiz, hayotni tasdiqlovchi shiorni plakatga chop etishingiz mumkin, ular har kuni sizni ilhomlantirib, bir vaqtning o‘zida xonadagi zerikarli devorni jonlantirishi mumkin.
Yorug’likni qo'lga olamiz
To‘g‘ri yoritish har qanday xonada muhim rol o‘ynaydi – bu yotoqxona, bolalar xonasi yoki sizning ish joyingiz bo‘lsa ham. Agar siz hali qandilni olib tashlashga yoki shamdonlarni osib qo‘yishga tayyor bo‘lmasangiz, unda hayvonlar, astrologik belgilar yoki svetofor shaklidagi quvnoq chiroqlarni qo’llashingiz mumkin. Yoki bir vaqtlar buvilarimizning kvartiralarida turgan retro lampalar har qanday interyerni yorqinlashtirib, uslubingizni ta’kidlaydi va interyerga quvnoqlik hissini bag‘ishlaydi.
Ranglar va trendlarni qo‘shing
G‘ayrioddiy shakldagi dizaynerlik kreslosi, «Art Deco» uslubidagi yorqin divan yoki geometrik kofe stoli interyerda keskin o‘zgarish yaratib, shu bilan har qanday, hatto eng ixcham va minimalist xonada diqqatni o‘ziga qaratuvchi aksent bo‘ladi. Ishonchimiz komilki, bunday xariddan song siz qayta-qayta kelishni istaydigan «magnit joy» ga ega bo‘lasiz.
Vintaj mebellari va antikvar buyumlarni sevuvchilarga esa 60-yillarning uslubidagi shkaf-servantlarni taklif qilamiz – eklektik, trendda va qulay (bu «seyf‘da qancha kichik narsalar, kitoblar va idishlarni yashirib qo‘yishingiz mumkinligini bir tasavvur qiling»).
Detallar yordamida kerakli tonga etishing
Gap uydagi eng mashhur joy – oshxona haqida bo‘ladi. Aynan o‘sha yerda inson o‘ziga yoqqan, ishlatishda oson va texnologik detallar bilan o‘ziga sharoit yaratishni xohlaydi. Bunda o‘z didingiz va cho‘ntagingizga mos ish tutishingiz mumkin: kimdir uchun an’anaviy o‘zbek naqshlari bo‘lgan yorqin lagan yoki idish-tovoq yordamida interyerni «yangilash» kifoya qiladi, kimgadir esa multfilmli toster yoki futuristik kofe mashinasi shaklidagi «og‘ir artilleriya» kerak bo‘ladi.
Interyerni bitta element bilan yangilang
Agar sizga bu ham to‘g‘ri kelmasa, unda interyerni devor oynasi yordamida yangilash mumkin, axir u uydagi eng ko‘p ishlatiladigan narsalardan biridir. Ko‘zgular xonani kengaytiradi, shu bilan o‘sha bizga kerak bo‘lgan aksentga aylanadi va shunchaki o‘z vazifasida ham ishlatiladi.
Yana bir plyus tomoni – oyna ramkalarining ulkan tanlovi: geometrik naqshlar, monogramlar yoki aksessuarlar, gulchambarlar va hatto ikebana bilan ramkalarni bezab, o‘z uslubingizga mos xona aksentiga ega bo‘lish mumkin. Bunday oyna shu qadar o‘ziga xos ko‘rinadiki, u devorlarda hech qanday bezakni talab qilmaydi.
Derazalarni o‘zgartiring
Hech bir ta’mirsiz makonni yangilashning yana bir usuli – derazalarni yangilashdir. Bu borada esa variantlar juda ko‘p: pardalarni yangilash, deraza romini bo‘yash, deraza tokchasini (agar u keng bo‘lsa) yostiqlar va shamlar bilan dam olish joyiga aylantirish, mini-tuvaklarda rayhon yoki xona o‘simliklarini ekib bog‘ tashkil etish kabi variantlar bor.
Saqlash tizimini tashkillashtiring
Esingizda bo‘lsin, har qanday tartibsizlik interyerning estetik tarkibiy qismini «o‘ldiradi», yaxshi tashkillashtirilgan joy esa yangilanish effektini yaratadi. To‘qilgan savatchalar, devor va shkaflar uchun «mobil» idishlar va osiladigan cho‘ntaklar olishning ayni vaqti – u yerda siz barcha narsalaringiz, xotiralaringiz va hatto kichik uy hayvonchlaringizni joylab qo‘yishingiz mumkin.
To‘qimali detallarni qo‘shing
Zamonaviy minimalistik interyer – bu silliq va aks ettiruvchi yuzalar, ranglarning sokin palitrasidir. Ajoyib, ammo bunga ozgina tekstil narsalarni qo‘shsak yanada ajoyib bo‘ladi! Shuning uchun biz to‘qilgan narsalar va gilam, teksturali yostiqlar, ko‘rpa-to‘shaklar, pledlar, devor pannolari va hatto terilar bilan makonga rang-baranglik qo‘shishingizni taklif qilamiz – asosiysi sizning didingizga mos kelsa bo’ldi.
