Oʻzbekistonda dam olish kunlarida ob-havo: Harorat sezilarli darajada pasayadi
Oʻzbekistonda dam olish kunlarida salqin havo barcha hududlarga tarqaladi. Harorat kunduz kunlari +27…+36, kechalari +17…+22 darajagacha pasayadi. Ayrim joylarda yomgʻir yogʻishi, momaqaldiroq boʻlishi mumkin.
Juma va dam olish kunlari salqin havo Oʻzbekistonning barcha hududlariga tarqaladi.
Juma va shanba kuni havo harorati asosan kunduz kunlari +31…+36, yakshanba kuni esa +27…+32 daraja atrofida boʻladi. Kechalari ham ancha salqinlashadi, harorat +17…+22 darajagacha pasayadi.
Shanba kuni Qoraqalpogʻiston Respublikasi, Xorazm, Buxoro, Navoiy viloyatlarining ayrim joylarida, yakshanba kuni Toshkent, Samarqand, Jizzax, Sirdaryo viloyatlarining baʼzi joylarida qisqa muddatli yomgʻir yogʻishi, momaqaldiroq boʻlishi mumkin.
Baʼzi joylarda shamol tezligi 15−20 m/s gacha kuchayishi, chang-toʻzonlar bilan kuzatilishi mumkin. Toshkent shahrida havo biroz bulutli, vaqti-vaqti bilan oʻzgaruvchan boʻladi, bugun va ertaga yogʻingarchilik kutilmaydi. Harorat asosan +33…+36 daraja boʻladi.
Yakshanba kuni qisqa muddatli yomgʻir yogʻadi, momaqaldiroq boʻladi. Harorat kechasi +19…+21 darajagacha, kunduzi +27…+29 darajagacha pasayadi. Sharqiy shamol yoʻnalishini oʻzgartirib, gʻarbdan 5−10 m/s tezlikda esadi, 10−15 m/s gacha kuchayishi mumkin.
