Dovurxon Karomatov Paralimpiya oʻyinlarining bronza medalini qoʻlga kiritdi
Paradzyudochi Dovurxon Karomatov -90 kg vazn toifasida gruziyalik raqibini yengib, bronza medalini oldi. U Tokio-2021 Paralimpiya oʻyinlarida kumush medalni qoʻlga kiritgandi.
Dzyudochi Dovurxon Karomatov erkaklar oʻrtasida J2 klassida -90 kg vazn toifasida Paralimpiya oʻyinlarining bronza medaliga ega boʻldi.
U tatamida gruziyalik Lasha Kizilashvilini magʻlubiyatga uchratdi. Shu tariqa Karomatov delegatsiya hisobiga 7-bronza medalni qoʻshib qoʻydi.
Bu Dovurxon Karomatovning faoliyatidagi ikkinchi Paralimpiya medali hisoblanadi. U bundan avval 2021-yilda Tokioda boʻlib oʻtgan oʻyinlarda kumush medalni qoʻlga kiritgan.
Dovurxon Karomatov 1998-yil 25-yanvarda tugʻilgan. 2018-yildan buyon para dzyudo boʻyicha Oʻzbekiston terma jamoa aʼzosi hisoblanadi. “Oʻzbekiston Respublikasida xizmat koʻrsatgan sportchi” faxriy unvoni sohibi. Murabbiyi Fozil Karomatov.
