Farrosh ayol mogʻor bosgan gilam ostidan 40 ming dollarlik tanga topdi
Iflos uylarni tozalashga ixtisoslashgan 21 yoshli Sharlotta Bosanket oʻz ishi davomida ajoyib kashfiyot qildi.
Mogʻorlagan gilam ostida u 1930-yilgi qiymati 40 000 dollarga baholangan noyob Avstraliya tangasini topdi. Ushbu mis tanga zarb qilish tarixidagi eng qimmatli va noyob tangalardan biri hisoblanadi.
“Uni ana shu chang-toʻzonlar orasidan topganimda yuragim dukurlab urardi. Bu haqiqiy yashirin xazina edi”, — dedi Sharlotta. Topilma narxi yuqori boʻlishiga qaramay, u tangalarni egalariga qaytardi.
Sharlotta oʻz ishini eng foydali ishlardan biri deb biladi. 2022-yilda u chiqindilarni, chirigan oziq-ovqat va keraksiz narsalarni chuqur tozalash bilan shugʻullanadigan Care Cleaning Services deb nomlangan oʻzining tozalash biznesini ishga tushirdi.
“Birinchi marta bunday tozalash bilan shugʻullanganimda, bu juda charchatadigan, lekin shu bilan birga juda foydali edi. Boshqa iloj yoʻqligini his qilayotgan odamlarga yordam berish imkoniyati dunyodagi eng yaxshi tuygʻu”, — dedi Sharlotta oʻz ishining muhimligini taʼkidlab.
