Gonzo G Asxab Tamayevning chaqirigʻini qabul qildi
Gonzo G avtobloger Asxab Tamayevning istalgan mashinasiga qarshi poygada qatnashib, uni yutishini maʼlum qilgan. U hattoki Chevrolet Cobalt ham BMW sportkarlaridan ildamlab ketishiga ishonmoqda.
Taniqli bloger va poygachi Asxab Tamayev Oʻzbekistondagi barcha avtomobil ishqibozlariga murojaat qilib, poygaga chaqirgandi. U oʻz videomurojaatida tez orada mamlakatga tashrif buyurishini va qiziqarli poyga tashkil etish niyatida ekanini aytgan.
Gonzo G nomi bilan tanilgan yana bir mashhur poygachi Tamayevning chaqirigʻini qabul qildi va oʻzi taqdim etgan avtomobillardan birida ishtirok etishini eʼlon qildi: BMW M3 Competition Touring, BMW IX va Cobalt.
“BMW M3 Competition Touring sening BMW M5, Lamborghini Aventador va Rolls-Royce mashinalaringdan ustun turadi”, — dedi Gonzo G va boʻlajak raqobatga intriga va shiddat qoʻshdi.
Undan oldinroq tadbirkor, avtopoygachi Sanjar Karimov ham Asxab Tamayevning chaqirigʻini qabul qilgandi. Oʻz oʻrnida, Tamayev ham unga javob qaytarib, oʻrtaga 1 million dollar tikish orqali poyga tashkil etishga tayyorligini bildirgan.
