Hamster Kombat oʻyinchilari tangalarni taqsimlashdan norozi: sabab nimada?
Nihoyat, 21-sentyabr kechasi Hamster Kombat oʻyinchilari kutilgan tangalarni — oʻyin ichidagi tokenlarni olishdi. Biroq kriptovalyutalar haqidagi Telegram kanallardagi foydalanuvchilar fikriga koʻra, koʻpchilik bundan noroziligini bildirgan.
Appleinsider nashri oʻyinchilar nima uchun pul olishi va uni qanday sarflashi mumkinligini oʻrgandi.
Hamster Kombat oʻyinida haqiqiy pul nima uchun beriladi?
Oʻyin yaratuvchilari vaʼdalariga amal qilib, 21-sentyabr kuni tangalarni tarqatishdi. Telegram kanallarda tarqalgan skrinshotlarga koʻra, pul miqdori quyidagi koʻrsatkichlarga bogʻliq: oʻyinchi qancha tanga toʻpladi va mini-oʻyinlarda qancha kalit ishlab topdi, doʻstlarini oʻyinga jalb qildimi, passiv daromad hisobiga qancha tanga oldi, kunlik vazifalarni bajardimi va boshqalar.
Koʻpchilik eng muhim koʻrsatkich passiv daromad deb oʻylardi, ammo aslida Hamster Kombat yaratuvchilari uchun taklif qilingan doʻstlar soni muhimroq boʻlib chiqdi. Buni mantiqan tushuntirish mumkin, lekin koʻpchilik nega oʻyinda ishlab topilgan kalitlar muhim ekanini tushunmayapti.
Appleinsider jurnalisti qiziqish uchun kalitlarni ishlab topishga qaror qildi. U toʻrtta kalitni olish uchun ikki soat sarfladi va shu vaqt ichida “juda koʻp reklama” koʻrishga majbur boʻldi. Kalitlarni olishning qiyinligi tufayli koʻpchilik bu bonus uchun “mukofot”dan norozi boʻldi. Aytgancha, baʼzilar tizimni chetlab oʻtib, generatorlarda kalitlarni yigʻishga urinishdi. Buning uchun oʻyinchilar keyinchalik ogohlantirish yoki taqiq olishdi.
Izohlar shuni koʻrsatadiki, oddiy foydalanuvchilar — kun boʻyi TOP-100 ga kirishga harakat qilib, koʻp vaqt sarflaganlar boshqalardan koʻproq xafa boʻlishdi. Ammo koʻproq pul ishlash uchun oʻyinga yangi ishtirokchilarni jalb qilish kifoya edi. Katta auditoriyaga ega blogerlar uchun doʻstlarni oʻyinga jalb qilish osonroq boʻldi.
Koʻpgina ommaviy axborot vositalari Hamster Kombatga shunchaki oʻyin sifatida qarashga va undan katta pul kutmaslikka chaqirgandi. Bundan tashqari, uning kriptovalyutasi har qanday vaqtda qadrsizlanishi mumkin.
Hamster Kombat tangasi qancha turadi?
Bu haqda biz 26-sentyabrda bilib olamiz — aynan shu kunda birjada listing boʻlib oʻtadi va HMSTR tokenining narxi maʼlum boʻladi. Hozir chatlarda taxminlar aytilmoqda va token 0,01 dan 0,1 dollargacha turishi mumkin deyilmoqda. Hech kimda aniq raqam yoʻq va hozircha aniq narxlarga umid qilmaslik maʼqul.
Agar siz Hamster Kombat oʻyinchisi sifatida juda oz pul olsangiz, xafa boʻlmang. Chunki baʼzi oʻyinchilar allaqachon tangalar bilan pul ishlashni vaʼda qilgan firibgarlarga ishonib, barcha tangalarini yoʻqotib qoʻyishgan.
