Har bir istirohat bogʻi, sayilgoh va xiyobonlarda bepul Wi-Fi oʻrnatiladi
Prezident Shavkat Mirziyoyev har bir istirohat bogʻi, sayilgoh va xiyobonlarga bepul Wi-Fi oʻrnatish boʻyicha topshiriq berdi.
Mirziyoyev raisligida oʻtkazilgan yigʻilishda maktab, kollej, texnikum, oliygoh sport zallari va kutubxonalari, stadion va basseynlar mahalla yoshlariga xizmat qilishini taʼminlash muhimligi taʼkidlandi.
Uchrashuvda belgilanishicha, yoz mavsumida “Yangi Oʻzbekiston vatanparvar yoshlari” dasturi asosida 2 million yoshlar sport va vatanparvarlik tadbirlari bilan qamrab olinadi.
Shuningdek, jamoaviy sport oʻyinlari, shaxmat, stol tennisi, badminton, yakka kurash, suzish boʻyicha tuman, viloyat hokimlari, vazirlar kubogi oʻtkaziladi.
Mutasaddilarga mahallalarda, maktab, texnikum, oliygoh, sihatgoh va oromgohlar zallarida, parklarda kitobxonlik, sheʼrxonlik, raqs, musiqa va kino kunlarini tashkil qilish topshirildi.
