Janubiy Koreyada Spark smartfon narxida sotilmoqda

Janubiy Koreyaning eski avtomobillar bozorida noodatiy taklif paydo boʻldi: boy jihozlangan Chevrolet Spark yangi iPhone narxida sotilmoqda. Eʼlon avtomobilning misli koʻrilmagan arzonligi va yaxshi texnik holati tufayli avtomobil ixlosmandlarining eʼtiborini tortdi.

Maʼlumotlarga koʻra, Chevrolet Spark charm salon, sensorli ekran, toʻxtash datchiklari, orqani koʻrish kamerasi, qotishma gʻildiraklar hamda haydovchi va yoʻlovchilarning qulayligi, xavfsizligini oshiruvchi boshqa koʻplab uskunalar bilan jihozlangan.

Avtomobil shu paytgacha 138 ming kilometr masofa bosib oʻtgan, bu besh yillik avtomobillar uchun oʻrtacha koʻrsatkichdir. Shu bilan birga, sotuvchi dvigatel va avtomat uzatmalar qutisi mukammal holatda ekaniga ishontirmoqda.

Haydovchi oʻzining Spark avtomobili uchun 1660 dollar narx belgilagan. Bu soʻnggi rusumli iPhone smartfonlarining narxi bilan teng. Avtomobil bozori mutaxassislari bunday past narxni yangi avtomobillar ommabopligi yuqori boʻlgan Janubiy Koreya bozorining oʻziga xos xususiyatlari, shuningdek, sotuvchining oʻz mashinasini tezda sotish istagi bilan izohlagan.