Makoley Kalkin “Follaut”ning ikkinchi mavsumida rol ijro etadi
“Uyda yolgʻiz” filmi yulduzi Makoley Kalkin Amazonʼning “Follaut” serialining yangi mavsumiga qoʻshiladi.
Manbalarning maʼlum qilishicha, aktyorga “telba daho” obrazi topshiriladi. Yangi qismlarning suratga olish ishlari noyabr oyida boshlanadi. Premyeraning aniq sanasi hali maʼlum emas.
“Follaut” xuddi shu nomdagi video oʻyinga asoslangan. Voqealar 2161-yilda kechadi: yadro urushidan soʻng AQSH xarobalari oʻrnida yangi davlat tashkil topadi. Asta-sekin uning aholisiga qonxoʻr mutantlar tahdid sola boshlaydi. Lyusi ismli qiz (Ella Pernell) omon qolish uchun kurashni boshlash maqsadida bunkerdan tashqariga chiqishga qaror qiladi.
Loyihada shuningdek, Uolton Goggins, Aaron Moten va Kayl MakLoklen ham ishtirok etgan. Jonatan Nolan va Liza Joy (“Yovvoyi Gʻarb dunyosi”) prodyuserlik qilishgan.
Tanqidchilar serialni yuqori baholadilar. Birinchi mavsum Prime Video striming xizmatidagi eng mashhur beshta loyiha qatoriga kirdi va eng yaxshi musiqa tanlovi uchun “Emmi” mukofotini qoʻlga kiritdi.
Kalkin ilgari ham televideniyeda, jumladan, “Amerika dahshatli voqealari tarixi” va “Adolatli Jemstonazlar” kabi seriallarda suratga tushgan.
