Nintendo ўйин овозлари билан ҳаракатларга жавоб берадиган будильникни тақдим этди
Nintendo янги қурилмани тақдим этди, аммо бу Switch 2 консоли эмас. Янгилик — Alarmo номли ҳаракатларга жавоб бера оладиган будильникдир. Хусусан, оддий имо-ишора билан уйғонишни кечиктириш ёки ўриндан туриб қўнғироқни тўхтатиш мумкин.
Будильник Nintendo ўйинларидан олинган кўплаб овозлар тўплами билан жиҳозланган. Улар орасида The Legend of Zelda: Breath of the Wild, Pikmin 4, Splatoon 3, Super Mario Odyssey ва Ring Fit Adventure бор. Жами 35 та товуш фони мавжуд. Бундан ташқари, қурилмани Nintendo ҳисобингизга улаб, Animal Crossing: New Horizons ва Mario Kart 8 ўйинларидан олинган овозлардан фойдаланиш имкониятига эга бўласиз.
Бу янгилик уйқунгизда қанчалик кўп айланаётганингизни кузатиш ва будильникнинг икки хил режими орасида алмашиш имконини беради. Оддий режимда, ўринда қанча узоқ ётсангиз, овоз шунчалик баланд бўлади. Юмшоқ режимда эса овоз баландлиги ўзгармайди. Шунингдек, анъанавий тугмани босиш орқали будильникни ўчириш имконияти ҳам мавжуд.
