Oʻzbekiston Global kiberxavfsizlik indeksidagi oʻrnini yaxshiladi
Oʻzbekiston 100 ballik tizimda 89,2 ball toʻpladi va reytingning ikkinchi (ilgʻor) guruhiga kirdi.
BMT Xalqaro elektraloqa ittifoqi (ITU) “2024-yilgi Global kiberxavfsizlik indeksi” (GCI) boʻyicha hisobotini eʼlon qildi.
Yangi metodologiyaga koʻra, Oʻzbekiston 100 ballik tizimda 89,2 ball toʻpladi va reytingning ikkinchi guruhiga (Tier 2) kirdi. 2020-yilda eʼlon qilingan avvalgi hisobotda Oʻzbekiston 71,11 ball toʻplagan edi.
GCI reytingi kiberxavfsizlikning beshta asosiy yoʻnalishi: qonunchilik, texnik, tashkiliy jihatlar, salohiyatni rivojlantirish va xalqaro hamkorlikni qamrab oluvchi 83 parametr asosida tuzilgan.
2024-yilgi hisobot mamlakatlarning kiberxavfsizlik sohasidagi yutuqlarini yanada aniqroq baholash uchun yangilangan besh bosqichli tahlildan foydalandi. Darajalarga Tier 1 (namunali), Tier 2 (ilgʻor), Tier 3 (oʻrnatilayotgan), Tier 4 (rivojlanayotgan) va Tier 5 (shakllanayotgan) bosqichlarga kiradi.
Oʻzbekiston Xitoy, Avstriya, Kanada, Rossiya, Qozogʻiston va Ozarboyjon kabi davlatlar qatorida Tier 2 – ilgʻor guruhiga kirdi. Baholashda dunyoning 194 davlati ishtirok etdi. Eng yaxshi Tier 1 guruhidan Avstraliya, Yaponiya, AQSH, Singapur, Italiya kabi davlatlar joy oldi. Yangi metodologiya 2023-yildagi ishlarni baholaydi va indeks har ikki yilda yangilanadi.
