Oʻzbekiston maktablarida birinchi qoʻngʻiroq. Eng esda qolarli suratlarni toʻpladik
Bugun, 4-sentyabr kuni Oʻzbekistondagi barcha maktablarda birinchi qoʻngʻiroq sadolari yangradi. Joriy oʻquv yilida 700 mingga yaqin oʻquvchi 1-sinfga bordi. Toping.uz respublikaning turli hududlarida bayram qanday nishonlangani haqida xabar beradi.
Oʻzekiston maktablarida 4-sentyabr de-fakto “Bilimlar kuni” hisoblanadi. Bunga qadar bayram 2-sentyabr kuni nishonlanar edi.
Bugundan eʼtiboran umumiy oʻrta taʼlim muassasalarida yangi oʻquv yili boshlandi. Quyida turli viloyatlarda birinchi qoʻngʻiroq tadbirlar qanday oʻtkazilganini tomosha qilasiz.
Toshkent shahri
Toshkent shahridagi 325 ta umumiy oʻrta taʼlim maktablarida 501 207 nafar 1-11-sinf oʻquvchilariga sinf xonalarining eshiklari ochildi.
Xususan, 1-sinfga qabul qilingan 48 223 nafar oʻquvchilar uchun bu kun ahamiyatli. Bu ularning hayotidagi muhim qadamlardan biri hisoblanadi.
Andijon viloyati
Andijon viloyatidagi barcha taʼlim muassasalarida yangi 2024-2025-oʻquv yili boshlanib, “Bir boʻlsak — yagona xalqmiz, birlashsak — Vatanmiz!” shiori ostidagi “Birinchi qoʻngʻiroq” tadbirlari oʻtkazildi.
Xorazm viloyati
Bugun Xorazmdagi barcha umumtaʼlim maktablarida ham birinchi qoʻngʻiroq sadolari jarangladi. 36 ming nafardan ziyod oʻgʻil-qizlar maktab ostonasiga ilk qadam qoʻyib, 1-sinfga qabul qilindi.
Navoiy viloyati
Navoiyda ham birinchi qoʻngʻiroq tadbirlari boʻlib oʻtmoqda. Shahar va tuman hokimlari barchani Oʻzbekiston Respublikasi davlat mustaqilligining 33 yilligi va yangi oʻquv yili boshlanishi bilan tabrikladi.
Viloyatning Zarafshon va Navoiy shaharlarida, shuningdek, Qiziltepa, Konimex, Uchquduq kabi tumanlarida hamda boshqa kichik maʼmuriy birliklarida bir qator yangi maktablar foydalanishga topsirilgan.
Samarqand viloyati
Samarqand viloyatidagi barcha maktabgacha taʼlim tashkilotlarida Maktabgacha va maktab taʼlimi vazirligi tomonidan 2024-2025-oʻquv yili boshlanishi munosabati bilan ishlab chiqilgan namunaviy ssenariyga koʻra, “Oʻzbekiston — mening vatanim” shiori ostida ochiq mashgʻulotlar tashkil etildi.
Qashaqadaryo viloyati
Qashqadaryoda ham mutasaddilar oʻquv yili boshlanishi munosabati bilan maktablarga borib, oʻquvchilarni va pedagoglarni tabrikladi. Shundan soʻng 1-sinf oʻquvchilariga prezident sovgʻasi topshirildi.
Sirdaryo viloyati
Sirdaryo viloyat hokimi Akmaljon Mahmudaliyev Mirzaobod tumanidagi 5-maktabda boʻlib oʻtgan birinchi qoʻngʻiroq tadbirida qatnashdi.
Maktab ostonasiga ilk bor qadam bosgan bolajonlarga 12 turdagi oʻquv qurollari, maktab sumkasi, darsliklar majmuasidan iborat prezident sovgʻalari topshirildi.
