Oʻzbekiston shaxmat olimpiadasini gʻalaba bilan boshladi
Shaxmat boʻyicha Oʻzbekiston erkaklar terma jamoasi Budapeshtda oʻtkazilayotgan shaxmat olimpiadasining birinchi bosqichida Trinidad va Tobago terma jamoasini magʻlubiyatga uchratdi, ammo ikki grossmeysterda muammoli pozitsiyalar kuzatildi. Ayollar jamoasi Gaiti vakillari bilan ishonchli tarzda kurash olib bordi.
10-sentyabr kuni Budapeshtda shaxmat boʻyicha har ikki yilda bir marta oʻtkaziladigan yirik jamoaviy musobaqa — 45-shaxmat olimpiadasi boshlandi. Bu yil Vengriyaga 200 ga yaqin davlatdan 380 nafar erkak va ayollar jamoalari keldi.
Musobaqada Oʻzbekiston erkaklar terma jamoasidan Nodirbek Abdusattorov, Nodirbek Yoqubboyev, Javohir Sindarov, Shamsiddin Vohidov va Jahongir Vohidov, ayollar terma jamoasidan Afruza Hamdamova, Nilufar Yoqubboyeva, Umida Omonova, Marjona Malikova va Nodira Nodirjonova ishtirok etmoqda.
Erkaklar terma jamoasi murabbiyi rossiyalik Vladimir Kramnik — sobiq jahon chempioni, shaxmatning XXI asrdagi timsollaridan biri, ayollar jamoasiga esa shaxmat olimpiadasida uch marta gʻolib chiqqan rossiyalik grossmeyster Aleksey Dreyev murabbiylik qiladi.
