Oʻzbekistonning yashil shaharlari reytingi eʼlon qilindi

11-iyul kuni Ekologiya, atrof-muhitni muhofaza qilish va iqlim oʻzgarishi vazirligi huzuridagi Iqlim oʻzgarishi milliy markazi tomonidan tashkil etilgan matbuot anjumanida ilk bor “Uzbekistanʼs Green Cities Rating” — Oʻzbekistonning 14 ta maʼmuriy markazi ekologik barqarorlik reytingi taqdim etildi.

Tasdiqlangan ekologik master rejalarni amalga oshirish, shuningdek, koʻrsatkichlarni yaxshilash asosida yiliga bir marta yangilanadigan reyting maʼlumotlariga koʻra, Namangan shahri 100 balldan 62,29 ball toʻplagan holda birinchi oʻrinni egalladi. Aholi jon boshiga yashil maydonlar soni boʻyicha yetakchi — Samarqand 61,13 ball bilan ikkinchi oʻrindan joy oldi. Uchinchi oʻrinni 59,50 ball bilan Navoiy shahri egallagan boʻlib, bu hududda bir kishiga respublika boʻylab isteʼmol qilinadigan elektr energiyasining eng kam miqdori toʻgʻri keladi.

Matbuot anjumani davomida shaharlarning birinchi ekologik master rejalarining taqdimoti boʻlib oʻtdi. Tajriba sifatida tanlab olingan Buxoro va Samarqand uchun ekologik master rejalar ishlab chiqildi. Oʻzbekistondagi ilk ekologik master rejalar Iqlim oʻzgarishi milliy markazi tomonidan tajriba-sinov shaharlarining hokimliklari hamda ekologiya vazirligining viloyat boshqarmalari bilan hamkorlikda ishlab chiqilgan.

Hujjatlar shaharlar infratuzilmasini va hududiy rejalashtirishni takomillashtirish, energiya samaradorligini oshirish hamda atrof-muhit va tabiiy resurslarga salbiy taʼsirlarni kamaytirish boʻyicha shahar maʼmuriyatlari uchun chora-tadbirlar rejasiga aylanadi.

Matbuot anjumanida taqdim etilgan 14 ta viloyat markazining ekologik pasporti amalga oshirilgan ishlarning salmoqli natijalaridan biri boʻldi. Ushbu pasportlar xalqaro “Green City Index” metodologiyasiga kiritilgan koʻrsatkichlar asosida yaratilgan.

Oʻzbekistonda Green City Index metodologiyasi 7 guruh koʻrsatkichlarini oʻz ichiga oladi: havo sifati, yerdan foydalanish, suv isteʼmoli, transport, energiya, chiqindilar va sanitariya. Koʻrsatkichlarning deyarli yarmi miqdoriy boʻlib, rasmiy maʼlumotlarga asoslangan, qayta ishlash darajasi va ifloslantiruvchi moddalar konsentratsiyasi shular jumlasidandir. Shaharning ekologik siyosatini baholash sifat koʻrsatkichlari hisoblanadi. Shaharlar umumiy reyting va har bir toifadagi individual reytinglar asosida baholanadi.

Respublikaning har bir hududi boʻyicha bosqichma-bosqich ekologik bosh rejalar va ekologik pasportlar shakllantirilishi, ular har yili koʻrib chiqilishi va yangilanishi koʻzda tutilgan. Faoliyatning asosiy koʻrsatkichlari tavsiyalarning ekologik bosh rejalarida koʻrsatilgan amalga oshirish natijalari boʻyicha shakllantiriladi, ular bevosita shahar yoki viloyatning ekologik barqarorlik reytingida aks ettiriladi.