Samarqandda domning 10-qavatiga basseyn qurilgani aniqlandi
Inspeksiya xodimlari tomonidan mulkdorga nisbatan maʼmuriy jarimalar qoʻllanildi va noqonuniy qurilmani bartaraf etish yuzasidan majburiy koʻrsatmalar berildi.
Samarqandda koʻp qavatli uyning penthaus qismida oʻzboshimchalik bilan basseyn qurilganligi aniqlandi. Bu haqda Qurilish va uy-joy kommunal xoʻjaligi vazirligi matbuot xizmati xabar berdi.
Aholi murojaatiga asosan oʻtkazilgan reyd tadbirlari davomida Samarqand shahri “Soʻgʻdiyona” mahallasidagi 67-A sonli koʻp qavatli uyning 10-qavati — penthaus qismida oʻzboshimchalik bilan basseyn qurilgani aniqlandi.
Qayd etilishicha, ushbu qurilma koʻp qavatli uyning loyihasida nazarda tutilmagan boʻlib, seysmik hodisa vaqtida binoning tebranishini kuchaytirib, uyning mustahkamligiga zarar yetkazishi mumkin.
Inspeksiya xodimlari tomonidan mulkdorga nisbatan maʼmuriy jarimalar qoʻllanildi va noqonuniy qurilmani bartaraf etish yuzasidan majburiy koʻrsatmalar berildi.
“Berilgan vaqt ichida mulkdor holatni oʻz ixtiyori bilan bartaraf qilib, oldingi holatiga qaytarmasa, unga nisbatan tegishli tartibda bartaraf etish yuzasidan fuqarolik ishlari boʻyicha sudga davo arizasi kiritilishi tushuntirildi”, — deyiladi xabarda.
