Shahrisabz aeroporti fuqaro aviatsiyasi parvozlari uchun oʻz faoliyatini tikladi
Havo qatnovlari An-2, An-24, Yak-40, RJ-85 rusumli samolyotlarda amalga oshirilgan. Ayni paytda aeroport fuqaro aviatsiyasi parvozlariga xizmat koʻrsatish imkoniyatiga ega.
Shahrisabz mahalliy aeroporti 11-sentyabr kuni fuqaro aviatsiyasining parvozlari uchun oʻz faoliyatini tikladi.
Uzbekistan Airports xabariga koʻra, Silk Avia aviakompaniyasining Toshkentdan ilk parvozi mahalliy vaqt bilan soat 13:10 da aeroportga borib qoʻndi. Parvoz vaqti 1 soat 30 daqiqani tashkil etdi.
Samolyot suv arkasi bilan, birinchi yoʻlovchilar esa karnay-surnay sadolari ostida tantanali ravishda kutib olindi. Aeroportga parvozlar deyarli 21 yildan soʻng qayta yoʻlga qoʻyilgan. Shahrisabz aeroporti 2003-yilning noyabr oyida yopilgan edi.
Shahrisabzdan 5 km janubi-gʻarbda qurilgan mazkur aeroport 1983-yilda ochilgan. 1983-1996-yillarda Toshkent-Shahrisabz yoʻnalishi boʻyicha parvozlar yoz oylarida haftasiga 4-marta, kuz-qish mavsumida esa 3-marta amalga oshirilgan, shuningdek, Urganch-Shahrisabz yoʻnalishi boʻyicha ham samolyotlar haftasiga ikki marta parvoz qilgan. 1993-1995 - yillarda Toshkent–Qarshi–Shahrisabz yoʻnalishida parvozlar amalga oshirilgan.
Havo qatnovlari An-2, An-24, Yak-40, RJ-85 rusumli samolyotlarda amalga oshirilgan. Ayni paytda aeroport fuqaro aviatsiyasi parvozlariga xizmat koʻrsatish imkoniyatiga ega. Uzunligi 1554 m va eni 35 m boʻlgan uchish-qoʻnish yoʻlagidan, ikkita samolyot va toʻrtta vertolyot turish joyiga ega aerodrom quyidagi turdagi samolyotlarni sigʻdira oladi: ATR-42, ATR-72, L-410 va barcha turdagi vertolyotlar. Aeroport majmuasi soatiga 100 yoʻlovchiga xizmat koʻrsatish imkoniyatiga ega.
