Telegram turli mamlakatlarning huquq-tartibot idoralari bilan hamkorlik qila boshladi
Telegram rahbariyatining odil sudlov bilan munosabatlarini normallashtirishga tayyorligi koʻplab milliy va xalqaro tergovlarni oldinga siljitish imkonini berishi kutilmoqda.
Telegram messenjer asoschisi Pavel Durov Parijda hibsga olinganidan soʻng, nafaqat Fransiya, balki boshqa davlatlar bilan hamkorlik qilib, ularning huquq-tartibot idoralari soʻroviga koʻra maʼlumotlarni taqdim qila boshladi.
Qayd qilinishicha, Yevropa Ittifoqi davlatlaridan biri allaqachon yuzga yaqin buyurtma qotillik muhokama qilingan Telegram guruhi soʻrovi boʻyicha javob olishga muvaffaq boʻlgan. Janubiy Koreyadan kelgan soʻrov ham javobni kutmoqda.
Fransiyada Telegram voyaga yetmaganlar boʻyicha milliy politsiya departamenti (OFMIN) soʻrovlariga, shuningdek, jandarmeriya soʻrovlariga javob bergan va ayrim gumondorlarning shaxsini aniqlash imkonini beruvchi maʼlumotlarni taqdim etgan. Gap bolalarga qarshi jinoyatlar haqida bormoqda.
Bahorda OFMIN messenjerda voyaga yetmaganlarga qarshi jinoyatlarning “tez va nazorat qilib boʻlmaydigan” darajada tarqalayotgani haqida xabar bergan edi. Baʼzi tergovchilar va sudyalarning fikricha, Telegram qurol, giyohvand moddalar, odam savdosi va buyurtma qotilliklari ham sodir boʻladigan “jinoyatchilik supermarketi”ga aylangan.
