Toshkentdagi ikkita tarixiy mahallada art-rezidensiyalar ochildi
Prezident yordamchisi Saida Mirziyoyeva Toshkentda UNESCOning Butunjahon merosi dastlabki roʻyxatiga kiritilgan tarixiy mahallalarda art-rezidensiyalar ochilganini maʼlum qildi.
“Kecha biz UNESCOning Butunjahon merosi dastlabki roʻyxatiga kiritilgan “Namuna” va “Hasti Imom” tarixiy mahallalarida art-rezidensiyalarning tantanali ochilish marosimini oʻtkazdik. Bu Toshkentning madaniy merosini asrab-avaylash va ijodiy muhitini rivojlantirish yoʻlidagi muhim qadamdir”, — deb yozadi Saida Mirziyoyeva.
Qayd etilishicha, loyiha Oʻzbekistonning barcha hududlari hamda boshqa mamlakatlarning ijodkor va hunarmandlarini qoʻllab-quvvatlashga qaratilgan. Art-rezidensiya tajriba almashish, madaniyatlararo muloqot va qoʻshma loyihalarni amalga oshirish platformasiga aylanadi.
Avvalroq Oʻzbekiston prezidenti yordamchisi Saida Mirziyoyeva shayxa Al-Mayassa bint Hamad bin Xalifa Ol Soniy bilan uchrashib, Samarqand shahridagi Bibixonim masjidini restavratsiya etish loyihasini muhokama qilgani toʻgʻrisida xabar berilgandi.
