Toshkentdagi Oʻzbekiston ovozi koʻchasining bir qismi 2 oyga yopildi
Mirzo Ulugʻbek tumanidagi Oʻzbekiston ovozi koʻchasining Shahrisabz koʻchasi bilan kesishmasidan Istiqlol koʻchasiga qadar qismi dekabr oyi oxirigacha yopildi. Bunga taʼmirlash ishlari sabab qilib koʻrsatilgan.
Toshkent shahri Mirzo Ulugʻbek tumanidagi “Oʻzbekiston ovozi” koʻchasining bir qismi vaqtincha yopildi. Bu haqda tuman hokimligi axborot xizmati xabar berdi.
Maʼlum qilinishicha, Oʻzbekiston ovozi koʻchasining Shahrisabz koʻchasi bilan kesishmasidan Istiqlol koʻchasigacha boʻlgan qismi 18-oktyabrdan 20-dekabrgacha avtomobillar harakati uchun yopilgan.
Bunga koʻchadagi taʼmirlash ishlari sabab qilib koʻrsatilgan. Ushbu koʻchada 24/7 rejimda faoliyat yuritadigan servis markazlari paydo boʻladi, koʻchaning infratuzilmasi toʻliq oʻzgaradi. Hokimlik keltirilgan noqulayliklar uchun uzr soʻragan.
