“Boshqotirma 2” Pixarʼning eng koʻp daromad keltirgan multfilmiga aylanadi
“Boshqotirma” multfilmining davomi jahon prokatida “Super oila 2”ni ortda qoldirib, Pixarʼning eng koʻp daromad keltirgan loyihasiga aylandi. Multfilm premyera qilingan kundan boshlab 1,2 milliard dollardan koʻproq daromad keltirgan.
“Boshqotirma 2” multfilmi premyera qilingan kundan buyon 1,252 milliard dollar ishlab topdi.
Shu orqali multfilm Pixarʼning eng daromadli loyihasi “Super oila 2”ni (1,242 milliard dollar foyda) ortda qoldirdi. Sikvel AQSHda 543,5 million dollar, xalqaro hududlarda esa 708 million dollar daromad keltirdi.
Film shuningdek, “Qirol sher” (2019), “Muz yurak” va “Super Mario aka-ukalari kinoda” filmlari bilan birga barcha davrlarning eng koʻp daromad keltirgan beshta animatsion filmlaridan biriga aylandi.
Ikkinchi “Boshqotirma” syujeti katta yoshli Raylining his-tuygʻulari haqida hikoya qiladi: endi unga quvonchdan tashqari, qaygʻu, gʻazab, qoʻrquv va jirkanish, tashvish, sharmandalik va kayfiyatsizlik qoʻshilgan.
