Oʻzbekistonda xalqaro anʼanaviy tasviriy va amaliy sanʼat festivali boʻlib oʻtadi

Tadbir oldidan 15-aprel kuni Badiiy akademiyada matbuot anjumani tashkil etilib, festival dasturi taqdim etildi. Tashkilotchilar festivalning asosiy maqsadlari madaniy merosni asrab-avaylash va ommalashtirish, yosh isteʼdodlarni qoʻllab-quvvatlash, ijodiy almashinuvni rivojlantirish va sanʼat sohasida xalqaro aloqalarni mustahkamlash ekanini alohida taʼkidladi.

Festival Toshkent shahri, viloyatlar markazlari va Qoraqalpogʻiston Respublikasidagi koʻrgazma maydonlarini qamrab oladi. Dasturda oliy oʻquv yurtlari, kollejlar va ixtisoslashtirilgan taʼlim muassasalari talabalari tomonidan tayyorlangan koʻrgazmalar, mahorat saboqlari, madaniy-maʼrifiy tadbirlar, modalar namoyishi, ilmiy anjumanlar va ijodiy taqdimotlar oʻrin olgan.

Markaziy tadbirlardan biri “Turk dunyosi rassomlari ayollari” xalqaro koʻrgazmasi boʻlib, unda TURKSOYga aʼzo mamlakatlardan 21 nafar rassomning asarlari namoyish etiladi. Festival doirasida Kyomyung universiteti (Janubiy Koreya) Tasviriy sanʼat fakulteti professorlarining koʻrgazmasi ham boʻlib oʻtadi.

Anʼanaga koʻra, “Kamoliddin Behzod izdoshlari” miniatyura va xalq amaliy sanʼati tanlovi gʻoliblari taqdirlanadi. Xorijlik mehmonlar uchun mamlakatimizning madaniy merosi va tarixiy obidalari bilan yaqindan tanishish maqsadida Samarqand shahriga bir kunlik ekskursiya tashkil etiladi.

Festival tadbirlari Badiiy akademiyasi yurisdiksiyasidagi barcha koʻrgazma maydonlarida: Markaziy koʻrgazmalar zali, Ikuo Xirayama xalqaro madaniyat karvonsaroyi, Toshkent Fotosuratlar uyi, Akademiya galereyasi, Kamoliddin Behzod nomidagi Milliy rassomlik va dizayn instituti, Respublika ixtisoslashtirilgan dizayn maktabi, shuningdek, Oʻzbekiston rassomlik galereyasida oʻtkaziladi.