16.07.2024
Oylikni oshirish haqida qanday gapirish mumkin: 9 ta yaxshi va 9 ta yomon maslahat
Ish haqi bo‘yicha muzokaralarning muvaffaqiyati, birinchi navbatda, dalillarga bog‘liq. Ish haqini oshirish sizning samaradorligingizga qanday ta’sir qilishini rahbarga ko‘rsatish muhimdir. Oylik haqidagi suhbatni to‘g‘ri olib borishga yordam beradigan to‘qqizta ijobiy va salbiy maslahatni to‘pladik.
![Leyla Li](/storage/authors/3Cuft8gKs6s4tWn1CRc2VxtCzRVAQVMA.webp)
Muallif
Leyla Li
![Oylikni oshirish haqida qanday gapirish mumkin: 9 ta yaxshi va 9 ta yomon maslahat](/storage/articles_sm/597/RdcpMyxEEv6W9HAXM00XdQqvS8iGTFLz.webp)
Buning uchun nima qilish kerak?
- Kichik tadqiqot o‘tkazing, profilingiz va darajangizdagi mutaxassislar uchun ish haqi chegarasini bilib oling. Shu tariqa real ma’lumotlar bilan ishlash va mo‘ljal olish osonroq bo‘ladi.
- Muvaffaqiyatlaringizni tahlil qiling va ularni miqdoriy jihatdan o‘lchang.
- Erishilgan natijalarga tayanib, ularni kelajakda, masalan, kelgusi yil davomida qanday yaxshilashingiz mumkinligi haqida o‘ylang. Axir ish beruvchini o‘tmish emas, kelajak qiziqtiradi. Shu maqsadda voqealar rivojining ehtimoliy variantlarini modellashtiring va sizning shaxsiy ishtirokingiz alohida bo‘linma yoki butun kompaniyaning yakuniy natijasiga qanday ta’sir etishi haqida aniq misollar keltiring.
- Bevosita rahbarni qanday yengillashtirishingiz mumkinligi haqida o‘ylang va kelgusi yilda hal qilishni rejalashtirgan vazifalarni aniq ifodalang.
- Hech bo‘lmaganda kichik masalalarda mas’uliyatni o‘z zimmangizga oling. Agar siz rahbarning kompaniyaning global taqdiri bog‘liq bo‘lmagan odatiy savollar bilan yozilgan xatlarga istar-istamas va uzoq javob berishini ko‘rsangiz, ularni mustaqil ravishda, qo‘shimcha kelishuvlarsiz hal qiling. Har bir xo‘jayin mas’uliyatni o‘z zimmangizga olish va vaqtini tejash istagingizni qadrlaydi. Muhimi: biz sizning vakolatingizga kirmaydigan masalalar haqida gapirmayapmiz.
- Agar natijalar uchun mukofotlar yoki bonuslar ko‘zda tutilgan bo‘lsa, bu natijalarga erishishga harakat qiling.
- Qaysi bilimlar, kasbiy va shaxsiy ko'nikmalar kompaniyada eng qimmatli va talabga ega ekanini aniqlang, shunda suhbat davomida siz ularni yaxshilash uchun qanday ishlayotganingizni tushuntirishingiz mumkin. Aytaylik, siz dolzarb vebinarlar, mahorat darslari, o‘quv kurslarini kuzatib borasiz va yangi chaqiruvlarni yaxshiroq uddalash uchun muntazam ravishda malaka oshirasiz.
- Karyerani rivojlantirish rejasini tuzing va uning asosiy bosqichlarini rahbarga sxematik ravishda ko‘rsating, shunda u sizning nima qilishga qodirligingizni bilib oladi.
- O‘zingiz aytgan g‘oyalardan tashqari ko‘proq foyda keltirish va shu orqali maoshingiz oshishiga erishish uchun yana nima qila olishingiz mumkinligini so‘rang.
Nima qilish kerakmas?
- Shaxsiy maishiy qiyinchiliklar bilan oylikni oshirishga urinish. Bunday muammolar har kimda bor, lekin ish beruvchini birinchi navbatda inflyatsiya yoki uy-joyingiz uchun kredit foizlarining o‘sishi emas, balki biznesni rivojlantirish qiziqtiradi.
- Boshqa kompaniyalarning eng yaxshi takliflari bilan manipulyatsiya qilish. Agar siz yaxshi obro‘ orttirgan bo‘lsangiz, tashqi kompaniyalardan hamkorlik bo‘yicha takliflar olish yoki olmasligingizdan qat’i nazar, sizni qonuniy ravishda yuqori baholashlari kerak. Ammo kompaniyangiz sodiqligingizni ham qadrlaydi, shuning uchun ko‘proq maosh olish istagini aynan boshqa kompaniyalardan kelayotgan takliflar bilan emas, balki o‘z yutuqlaringiz bilan asoslang.
- Rahbar maoshni oshirish haqida gap ochishini kuting. Qiziqishlaringiz har xil. Ish beruvchi ko‘proq to‘lashdan manfaatdor emas. Shuning uchun suhbatni siz boshlashingizga to‘g‘ri keladi.
- Ish haqini oshirishni juda tez-tez va har bir erishilgan natija uchun so‘rash. Vazifalarni sifatli bajarish – normal amaliyot, haddan ortiq yutuq emas
- Hamkasbi ko‘proq olayotganini bahona qilish. Bu ish beruvchi nazarida sizning qadr-qimmatingizni oshirmaydi.
- Emotsional tarzda gapirish, ‘‘rahm keltirish”, hamkasblaringizni siz ular tufayli nimadir qila olmayotganlikda ayblash.
- Avval e’lon qilingan kelishuvlarga rioya qilmaslik.
- Muzokaralarni rahbar bilan yolg‘iz emas, omma oldida olib borish.
- Ishdan bo‘shash bilan shantaj qilish.
Shuni yodda tutingki, muloqotga juda ko‘p narsa bog‘liq. Rahbar o‘z dalillarini keltirishiga tayyor bo‘ling. Qiziqish, moslashuvchanlik va intilayotgan natijaga erishish uchun ularga qanday javob berishingizni oldindan o‘ylashingiz mumkin.