Тошкентда тирбандликларга қарши курашиш учун янги департамент ташкил этилади
Пойтахт ҳокими Шавкат Умурзоқов шаҳар аҳолиси яқин кунларда ўзгаришларни ҳис қилишини маълум қилди.
Тошкентда тирбандликларга қарши курашиш ва йўл муаммоларини бартараф этиш учун янги департамент ташкил этилади, деб хабар бермоқда «Ўзбекистон 24».
Пойтахт ҳокими Шавкат Умурзоқов Тошкент йўлларидаги тирбандликлар масаласига эътибор қаратди. Президент топшириғига биноан, пойтахт ҳокимлиги ва Транспорт вазирлиги Йўлларни бошқариш департаментини ташкил этади.
«У ўзини ўзи таъминлаш механизми асосида фаолият юритади, йўл муаммоларини ҳал этади ва қатор ваколатларга эга бўлади. Президент ишчи гуруҳ томонидан ишлаб чиқилган режаларни тасдиқлади. Ўйлайманки, яқин кунларда Тошкент аҳолиси бу ўзгаришларни ҳис эта бошлайди», — деди Умурзоқов.
Эслатиб ўтамиз, бош режага кўра Тошкент 3 та зонага бўлинади. Консервация зонасида маданий мерос бинолари, тарихий жойлар, уйлар ва яшил ҳудудлар ўзгаришсиз қолади. Реконструкция зонасида мастер-режалар асосида қўшимча қурилишлар қилиш мумкин бўлади. Реновация зонасида эскирган уй-жой, бинолар ўрнида янги қурилишлар ва таъмирлаш амалга оширилади.
