Avval va hozir: “3 savdoyi” filmi aktyorlari 15 yilda qanchalik oʻzgardi?

Filmda bosh rollarni Amir Xon, Ranganatan Madxavan va Sharman Joshi oʻynagan. Film voqealari hozirgi kun hamda 10 yil avvalgi voqealarni eslash bilan kechadi.

Filmda bosh obraz — Ranchxod Das Chanchad, Hindistondagi Imperial injenerlar kolleji talabasidir. Filmdagi bosh qahramonga sherik obraz sifatida Karina Kapur tanlangan. Asar Hindiston taʼlim tizimidagi bosimlar haqida kuchli satirik tarzda ishlangan.

Filmning bosh qahramoni Amir Xon (Rancho) inson ichki falsafasini ochib beruvchi rollari bilan muxlislar qalbidan joy olgan. U “3 savdoyi”da suratga tushganda 44 yoshda boʻlgan. Hind kinosi afsonasi ayni kunlarda prodyuserlik bilan shugʻullanmoqda.

Sharman Joshi (Raju) hind aktyori va teleboshlovchisi boʻlib, asosan hind filmlarida faoliyat olib borgan. Unga mashhurlik aynan shu film orqasidan kelgan. U 2010-yilda “Eng yaxshi ikkinchi plandagi aktyor” nominatsiyasida IIFA mukofotiga sazovor boʻlgan. Joshi ayni paytda telekoʻrsatuvlarda boshlovchilik qiladi.

Ssenariynavis va prodyuser Ranganatan Madxavan (Farhan) 2010-yillardan keyin hind filmlarida koʻrinmay qolgandi. U 2015-yilda kombek qilib, Amazon striming-xizmati tomonidan ishlangan “Nafas” veb-serialida suratga tushdi. Aktyor hozirda keng koʻlamli xayriya ishlari bilan shugʻullanadi.

Hind filmi qirolichalaridan biri hisoblanuvchi Karina Kapur (Pia) ayni damda 44 yoshda. U koʻplab mukofotlar, shu qatorda, olti karra Filmfare mukofotiga sazovor boʻlgan va Bollivudning eng mashhur va eng koʻp haq toʻlanadigan aktrisalaridan biri. U 2022-yilda Forrest Gampning hindcha muqobilida Amir Xon bilan juftlik rolida koʻrinish bergan.

2020-yilda Boman Irani (Virus) boʻlsa havaskor va professional ssenariy mualliflarini birlashtirish maqsadida Spiral Bound nomli mahorat darsini oʻta boshladi. Mehmon maʼruzachilar orasida dramaturg Anosh Irani va rejissyorlar Rajkumar Hirani, Ram Madhvani va Shakun Batra ham bor edi. Spiral Bound 500 dan ortiq sessiyalarni oʻtkazdi.

42 yoshli Omi Vaidya (Chatur) oʻzining “3 savdoyi”dagi betakror roli bilan muxlislar yodida qolgan. AQSHda tugʻilib oʻsgan Omi koʻplab qisqa metrajli filmlarga rejissyorlik qilgan va toʻliq metrajli filmlar montajchisi sifatida faoliyat yuritgan. U, shuningdek, bir qancha reklamalarda rol oʻynagan hamda prodyuser sifatida ham ish olib borgan.

Rahul Kumar (Millimetr) hozirda 29 yoshda. U film aktyorlari ichida eng yoshi edi, chunki Kumar gavdalantirgan rol ham shunga yarasha boʻlgan. Aktyorga tom maʼnodagi mashhurlik aynan “3 savdoyi”dan kelgan. U hozirda qoʻshiqchilik bilan shugʻullanib, reklamalarda suratga tushmoqda.

Ushbu maqola yordamida sizga xotiralar olamiga shoʻngʻishga yordamlasha olgan boʻlsak, oʻz vazifamizni toʻliq bajargan boʻlamiz. Toʻplamni serialni sevib tomosha qilgan yaqinlaringizga ham ulashib, ularni hayratda qoldirishni unutmang. Keyingi maqolalarda koʻrishguncha, oʻzingizni ehtiyot qiling!