Avval va hozir: “Sardor” seriali aktyorlari 24 yilda qanchalik oʻzgardi?
Rejissyor Shavkat Mahbubovning eng taniqli asari sifatida tilga olinadigan serial 2000-yilda tasvirga olingan. Kartina ssenariysini Yusuf Roziqov yozgan.
“Sardor” seriali 2000-yilda rejissyor Shavkat Mahbubov tomonidan suratga olingan. Loyiha yoshlarda vatanparvarlik hissini uygʻotish va ularni harbiy xizmatga jalb qilish uchun ishlangan.
Serialda taniqli ijodkorlar: Bobur Yoʻldoshev, Jamshid Arslonov, Nigora Karimboyeva, Durdona Tursunboyeva, Yoqub Ahmedov, Karim Mirhodiyev, Mahmud Ismoilov, Fotih Jalolov va Oʻtkir Mengliyevlar rol ijro etgan.
Toping.uz muharrirlari serial aktyorlarining 24 yil ichida qanchalik oʻzgarganiga qiziqdi va ularning avvalgi hamda hozirgi suratlarini bitta maqolaga jamladi. Kelgusi 10 daqiqa vaqtingizni maroqli oʻtkazasiz, degan umiddamiz.
Bobur Yoʻldoshev (Zafar Davlatnazarov) serialning suratga olish jarayonida 21 yoshda boʻlgan. U “Sardor”dan soʻng birin-ketin “Osmondagi bolalar 2”, “Sevinch”, “Vatan”, “Zabarjad”, “Omad”, “Qoʻrgʻoshin”, “Togʻa” kabi filmlarda bosh rollarni ijro etgan.
Nigora Karimboyeva (Zamira) oʻsha vaqtda 21 yoshda boʻlgan. Ushbu serialdagi epizod aktrisaning ilk rollaridan biri hisoblanadi. U hozirgi kunga qadar “Alvido”, “Vatan”, “Chashma”, “Osmon yaqin”, “Dada”, “Sabot”, “Togʻa” kabi filmlarda turli darajadagi rollarni ijro etgan.
Aktyor Ulugʻbek Yunusov “Sardor” serialida kursant Oʻktam rolini ijro etgan. “Sardor” seriali aktyorning ilk rollaridan biri hisoblanadi. Undan tashqari “Qaytar dunyo” serialidagi Abdulla roli bilan ham aktyor muxlislar orasida mashhurlikka erishgan.
“Sardor” serialida kursant Ismoil Qudratov rolini ijro etgan Shomahmud Shorasulov 31 yoshda boʻlgan. Dublyaj rejissori boʻlib ishlayotgan Shomahmud Shorasulov “Sardor”dagi rolining katta qismi kesib tashlanganini va shundan soʻng filmlarda rol ijro etmaganini maʼlum qilgan edi.
Aktyor Oʻtkir Mengliyev “Sardor” serialida starshina Eshjonov rolini ijro etgan. Aktyor oʻshanda 23 yoshda boʻlgan. Oʻtkir Mengliyev “Kichkina odamlar”, “Tavba”, “Advokatlar”, “Dada”, “Zirapcha”, “Akajon, xizmatingizdamiz”, “Taqdirlar” kabi bir qancha filmlarda turli darajadagi rollarni ijro etgan.
Jamshid Arslonovni kino ixlosmadlari “Sardor” serialidagi janjalkash kursant Botir Roziqov roli bilan tanishadi. U serialda 22 yoshida suratga tushgan. “Zanjir”, “Chempionlik orzusi” seriallari hamda “Otamdan qolgan dalalar” filmida turli darajadagi rollarni ijro etgan.
Ushbu maqola yordamida sizga xotiralar olamiga shoʻngʻishga yordamlasha olgan boʻlsak, oʻz vazifamizni toʻliq bajargan boʻlamiz. Toʻplamni filmni sevib tomosha qilgan yaqinlaringizga ham ulashib, ularni hayratda qoldirishni unutmang. Keyingi maqolalarda koʻrishguncha, oʻzingizni ehtiyot qiling!
