Mashhur tennischi Rafael Nadal professional faoliyatini yakunladi
Ispaniyalik tennischi Rafael Nadal vatanidagi Malaga shahrida boʻlib oʻtgan Devis Kubogi musobaqasida ishtirok etib, professional faoliyatini yakunladi.
Nadal soʻnggi bahsida niderlandiyalik tennischi Botik van de Zandshulpga (4:6, 4:6) imkoniyatni boy berdi. Nadal Devis Kubogining yakkalik bahslarida 20 yil ichida birinchi marta magʻlub boʻldi, bungacha ketma-ket 29 bahsda gʻalaba qozongan edi.
“Bu mening oxirgi oʻyinim ekani qaysidir maʼnoda yaxshi boʻldi. Men Devis Kubogidagi birinchi oʻyinimda magʻlub boʻldim va oxirgi oʻyinda ham magʻlub boʻldim. Shunday qilib, biz davrani yopamiz”, dedi Nadal oʻyindan soʻng.
Niderlandiya Ispaniyani 2:1 hisobida magʻlub etganidan soʻng Nadalning faoliyati yakunlandi.
Malagadagi stadionda Nadal sharafiga tantanali marosim boʻlib oʻtdi. Jamoatchilikka murojaati chogʻida tennischi oʻz oilasi va professional faoliyati davomida uni qoʻllab-quvvatlagan barchaga minnatdorchilik bildirdi.
“Haqiqat shundaki, siz hech qachon bu nuqtaga borishni xohlamaysiz. Men tennis oʻynashdan charchamadim, lekin tanam oʻynashni istamayapti va buni qabul qilish kerak”, dedi Nadal.
