Дилдора Ниёзованинг Жиззахдаги концерти бекор қилинди, хонанда ташкилотчиларни айблади

Дилдора Ниёзованинг продюсери ва турмуш ўртоғи Латиф Юсуповнинг сўзларига кўра, концерт дастлаб 22 декабрь куни бўлиши керак эди. У ташкилотчилар билан узоқ йиллик ҳамкорликда ишлаганини, шу боис аванс талаб қилинмаганини таъкидлади. Унга кўра, концерт олдидан ташкилотчиларга пул тайёрлиги ҳақида сўралганида ҳам, ҳеч қандай муаммо йўқлиги айтилган. Аммо тўйхонага келганларида, ташкилотчилар пул йўқлигини билдиришган. Кейинчалик, ҳамкорларидан бири пулни олиб қочиб кетгани маълум бўлган.

Дилдора Ниёзова мухлислар ҳафсаласи пир бўлмаслиги учун биринчи сеансни хайрия сифатида ўтказишга қарор қилган. Концерт якунланганидан сўнг эса ташкилотчилар кечки сеанс бекор қилиниши ва чипталар учун пул қайтарилишини маълум қилишган. Бу жараёнда тўйхона эгалари ҳам иштирок этган. Шунингдек, кечки сеанс чипталарининг катта қисми олдиндан сотиб олинган бўлиб, ташкилот раҳбари вазиятдан хабардор бўлган.

Хонанданинг турмуш ўртоғи айрим мухлисларнинг 7-8 соат кутгани ҳақидаги хабарларни рад этди. Унинг сўзларига кўра, томошабинлар шунча вақт кутмаган, акс ҳолда, уларга олдиндан хабар бериларди. Юсупов ташкилотчилар биринчи ҳисобга пул тушмаганини, кейин эса маблағ йўқолганини билдирганини таъкидлади.

Дилдора Ниёзованинг Миллий гвардия ходимлари кузатувида ҳаракатланганига ҳам изоҳ берилди. Юсупов бу ходимларни хонанда ёлламаганини, балки тадбир хавфсизлигини таъминлаш мақсадида ташкилотчилар томонидан чақирилганини айтди. Унга кўра, концерт залида одам жуда кўп бўлиб, тартиб-интизомга эътибор қаратилмаган. Бундан ташқари, ташкилотчилар пул тушмаганини билдирганига қарамай, зал тўла бўлган ва томошабинлар чипталарни нақд пулга сотиб олганини таъкидлаган.

Дилдора Ниёзова Instagram саҳифаси орқали мухлислари саволларига жавоб берди. У баъзан инсон ҳаётида кутилмаган ҳолатлар содир бўлишини ва бу ҳақида нолиш нотўғри эканини айтган. Хонанда мухлисларидан тушунишларини сўраб, пулни ўзи учун эмас, балки санъат жамоаси учун муҳим эканини таъкидлади.

У ўз фаолияти давомида концертлардан чарчаганини ва санъаткор сифатида ўз ишининг тўғрилигига шубҳа билан қарашини билдирган. Унинг сўзларига кўра, мухлисларнинг меҳрини кўргач, пул олмаган бўлса ҳам концерт ўтказишга қарор қилган. Ташкилотчилар унга пулни бир ҳафта ичида қайтаришини билдирган, бироқ хонанда бу маблағ керак эмаслигини ва мухлисларга чипталар учун пуллари қайтарилишини исташини айтган. Шу билан бирга, унга тўланиши керак бўлган пулларнинг фақат жуда кичик қисми берилган ва хонанда ушбу маблағни созандаларига тақсимлаганини билдирган.