Toshkentda 29-xalqaro turizm yarmarkasi oʻtkaziladi
21−23-noyabr kunlari Toshkentdagi “Central Asian Expo Uzbekistan” (CAEx) koʻrgazma majmuasida “Ipak yoʻlida turizm” — 29-Toshkent xalqaro turizm yarmarkasi (TXTY) boʻlib oʻtadi.
Yarmarkada xorijiy turistik kompaniyalar, milliy va hududiy tashkilotlar, assotsiatsiyalar, vakolatxonalar, mehmonxonalar, aviakompaniyalar, onlayn bronlash tizimlari, shuningdek, transport kompaniyalari va boshqalar ishtirok etadi.
TXTY dasturi doirasida konferensiyalar, B2B uchrashuvlari, davra suhbatlari, turizm xizmatlari va hunarmandchilik koʻrgazmalari, Oʻzbekiston hududlari turizm salohiyati taqdimotlari, gastronomik va boshqa koʻplab tadbirlar oʻrin olgan.
Maʼlumot uchun, TXTY Oʻzbekiston va butun Markaziy Osiyo mintaqasi turizm sanoati uchun muhim voqea sifatida 1995-yildan beri BMT Butunjahon turizm tashkiloti koʻmagida oʻtkazib kelinmoqda.
Yarmarkada oʻnlab mamlakatlarning sayyohlik imkoniyatlari taqdimotlari, yuzlab turizm sohasi mutaxassislarining ishbilarmonlik muzokaralari, xalqaro turizmni rivojlantirishning dolzarb mavzulariga bagʻishlangan xalqaro anjumanlar oʻtkaziladi. Oʻtgan yili TXTYda rekord koʻrsatkich qayd etildi — 3 kun ichida 30 ta davlatdan 300 dan ortiq soha vakillari va 13 ming ishtirokchi qatnashgan.
