Yandex Mapsʼga Oʻzbekistondagi diqqatga sazovor joylarning 3D modellari kiritildi
Yandex Maps ilovasida Toshkent, Buxoro, Samarqand va Xiva shaharlaridagi diqqatga sazovor joylarning 3D modellari joylandi. Kompaniya jami Oʻzbekistondagi obidalarning 27 ta uch oʻlchamli modelini ishlab chiqdi.
Yandex Uzbekistan Yandex Maps navigatsiya ilovasiga Toshkent, Buxoro, Samarqand va Xivadagi diqqatga sazovor joylarning uch oʻlchamli rangli modellarini qoʻshdi. Bu haqda kompaniya matbuot xizmati xabar berdi.
Toshkentda Hazrati Imom majmuasi, Koʻkaldosh madrasasi va Chorsu bozorini, Buxoroda Poyi Kalon va Labi Hovuz meʼmoriy ansambllarini, Samarqandda Registon maydoni va Mirzo Ulugʻbek rasadxonasini, Xivada esa Kalta minorni koʻrish mumkin.
Barcha modellarda arxitektura xususiyatlari, yozuvlar, ranglar, soyalar koʻrinadi. Agar tungi rejim yoqilsa, real shaharda oqshom tushishi bilan chiroqlar paydo boʻladi.
“Biz Oʻzbekistonning mashhur joylarining 27 ta uch oʻlchamli modelini yaratdik va buning uchun 350 soatdan koʻp vaqt sarfladik. Endi Yandex Maps foydalanuvchilari kerakli hududda yaxshiroq moʻljal olishi mumkin boʻladi. Shuningdek, ular diqqatga sazovor joylarni barcha rakurslarda oʻrganib chiqishi mumkin”, — deya izoh berdi Yandex Uzbekistan rahbari Izzat Shukurov.
Ilovada 3D modellarni koʻrish uchun qidiruv paneliga joy nomini kiriting yoki xaritadan obyektni toping va uni kattalashtiring.
