iPhone 16 Pro poygasi yakunlandi. Gʻolibga qimmatbaho smartfon topshirildi

Jamoamiz bilan birgalikda qariyb bir oy davomida iPhone 16 Pro uchun poyga tashkil etdik. Unda umumiy hisobda mingdan ortiq ishtirokchi qatnashdi.

8-noyabr kuni esa yakuniy natijalarni eʼlon qildik. Saytdagi maʼlumotlarga koʻra, birinchi oʻrinni andijonlik Muhammadaziz qoʻlga kiritdi. U 400 dan ziyod doʻstini taklif qilgan.

Shu kunning oʻzida biz toʻrt nafar omadli ishtirokchi uchun fitnes-soatni ham oʻynadik. Ularga sovgʻalar tez orada yetkazib beriladi. Toʻliq roʻyxat bilan ushbu havola orqali tanishishingiz mumkin.

iPhone 16 Pro kimga nasib etdi?

Yuqorida aytilganidek, gʻolibning ismi Muhammadaziz. U 17 yoshda. Andijon shahrida istiqomat qiladi. Ushbu ishtirokchimiz oʻyin boshidan beri juda ham faol edi. Poyganing birinchi haftasida hatto Xiaomi Sound Outdoor 30W portativ karnayini ham yutib olgan.

Biz u bilan 10-noyabr kuni Toshkent shahrida uchrashib, sovgʻalarini topshirdik. Muhammadaziz saytimiz tomonidan oʻtkaziladigan sovrinli musobaqalarda faol ravishda ishtirok etib kelishini va hamda doʻstlariga ham taklif qilishini aytdi.

Chempionning taʼkidlashicha, u poyganing oxirgi soniyalarigacha ham harakat qilishdan toʻxtamagan. Chunki yakunda ikki nafar favorit paydo boʻlgandi. Ular orasidan kim yutishi biz muharrirlarga ham juda qiziq boʻldi.

Muhammadazizning gʻalaba hikoyasi

17 yashar chempionimiz Andijon shahrida parfyumeriya doʻkoni borligini va doimiy ravishda shu yerda boʻlishini taʼkidladi. U asosiy maqsadini doʻkonga keluvchilarga qaratgan. Har bir mijozdan uning uchun saytdan roʻyxatdan oʻtishni soʻragan.

Shuningdek, u barcha doʻstlari, qarindoshlari va tanishlaridan ham saytga obuna boʻlishni soʻragan. Bu orqali qimmatbaho sovgʻa yutib olishini bilganlar ham oʻyinga qiziqa boshlagan. “Hali rejalarim koʻp, oʻyin oxirigacha 1-oʻrinni ushlab qolaman”, degan edi Muhammadaziz bundan oldingi intervyuda.

Biz unga 9-noyabr kuni Toshkentga kelish haqida xabar berdik. 10-noyabr kuni esa gʻolibimiz bilan uchrashib, oʻz sovgʻalarini topshirdik. U bunday katta sovgʻadan benihoya xursand ekanini aytib, sayt ijodkorlariga minnatdorlik bildirdi.

iPhone 16 Pro ochilmoqda

Biz Muhammadazizning iPhoneʼni ochayotganini tasvirga tushirishga ulgurdik. Tasvirlarda uning hayajonini koʻrish qiyin emasdi. U avval ham Apple smartfonini ishlatgani bois umuman qiyinchiliksiz qurilmani yoqa oldi.

Telefon yonishi bilan koʻz 16ʼga qoʻshilgan kamera tugmasiga tushdi. Uni tushunib olishimizga biroz vaqt ketdi. Ammo bu funksiya rasm tushishni xush koʻradiganlar uchun ancha qoʻl kelganini qoʻshimcha qilishimiz kerak.

iPhone qutisidan yangi dizayndagi quvvatlagich simi ham chiqdi. U eskisidan farqli oʻlaroq yirtilmaydigan materialdan tayyorlangan. Appleʼga bunday qulaylik uchun rahmat aytib qoʻyish kerak.

Tasvir sifati va ovoz koʻrsatkichlari

15ʼdan farqli oʻlaroq 16ʼning ekranlari 0,2 dyumga oshdi: iPhone 16 Pro 6,3 dyuym va Max versiyasida 6,9 dyuym. Bu iPhone tarixidagi eng katta displeylardir. Korpusning materiali hali ham titan. Toʻrt xil rangda mavjud. Biz gʻolibga Desert Titanium rangidagi qurilmani sovgʻa qildik.

Kompaniya iPhone 16 Pro Maxʼni avtonom ishlash vaqti eng uzoq boʻlgan smartfoni deb atagan. iPhone 16ʼning barcha sunʼiy intellekt funksiyalari, albatta, Pro liniyasida ham mavjud boʻladi. Smartfonlar hatto boshqa, kuchliroq protsessor — A18 Pro oldi.

Yangi chip talabchan oʻyinlarda asqatadi: grafikani qayta ishlash oʻtgan yilgi A17 Proʼdan 20% tezroq amalga oshiriladi. Umuman olganda, A18 Proʼda hisob-kitoblar oldingi avlodga qaraganda taxminan 17 foiz tezroq amalga oshiriladi.

Biz ovoz testini ham oʻtkazib koʻrdik. Yangi iPhone testda sinalgan boshqa qurilmalardan koʻra ovozni tiniqroq, aniqroq va balandroq chiqarib berdi. Bunga koʻplab sabablar bor, albatta.

Xulosa

Toping.uz internet nashri yana bir tanlovni muvaffaqiyatli ravishda oʻtkazdi. Hozirgi kunda soxta havolalar orqali firibgarlar tuzogʻiga tushib qolish holatlari koʻpayganini bilamiz. Shu bois biz oʻtkazayotgan oʻyinlar ham odamlarda shubha uygʻotishi mumkin.

Ammo siz oʻzingiz shartlar bilan toʻliq tanishib, bizni ijtimoiy tarmoqlar orqali doimiy ravishda kuzatib borsangiz, hammasi haqqoniy ekaniga ishonch hosil qilasiz. Shundan soʻng bu haqda tanishlaringizga ham aytib, ularni ham sovringa ega boʻlish uchun taklif qilishingiz mumkin.

Saytimizni va tarmoqlardagi sahifalarimizni kuzatib boring. Biz hali koʻpgina tanlovlarni oʻtkazamiz, qimmatbaho sovgʻalarni taqdim etamiz. Shu bois eʼlonlardan bexabar qolib ketmang. Yaxshi kunlarda koʻrishguncha!