Аввал ва ҳозир: «Сардор» сериали актёрлари 24 йилда қанчалик ўзгарди?
Режиссёр Шавкат Маҳбубовнинг энг таниқли асари сифатида тилга олинадиган сериал 2000 йилда тасвирга олинган. Картина сценарийсини Юсуф Розиқов ёзган.
«Сардор» сериали 2000 йилда режиссёр Шавкат Маҳбубов томонидан суратга олинган. Лойиҳа ёшларда ватанпарварлик ҳиссини уйғотиш ва уларни ҳарбий хизматга жалб қилиш учун ишланган.
Сериалда таниқли ижодкорлар: Бобур Йўлдошев, Жамшид Арслонов, Нигора Каримбоева, Дурдона Турсунбоева, Ёқуб Аҳмедов, Карим Мирҳодиев, Маҳмуд Исмоилов, Фотиҳ Жалолов ва Ўткир Менглиевлар роль ижро этган.
Топинг.уз муҳаррирлари сериал актёрларининг 24 йил ичида қанчалик ўзгарганига қизиқди ва уларнинг аввалги ҳамда ҳозирги суратларини битта мақолага жамлади. Келгуси 10 дақиқа вақтингизни мароқли ўтказасиз, деган умиддамиз.
Бобур Йўлдошев (Зафар Давлатназаров) сериалнинг суратга олиш жараёнида 21 ёшда бўлган. У «Сардор»дан сўнг бирин-кетин «Осмондаги болалар 2», «Севинч», «Ватан», «Забаржад», «Омад», «Қўрғошин», «Тоға» каби фильмларда бош ролларни ижро этган.
Нигора Каримбоева (Замира) ўша вақтда 21 ёшда бўлган. Ушбу сериалдаги эпизод актрисанинг илк ролларидан бири ҳисобланади. У ҳозирги кунга қадар «Алвидо», «Ватан», «Чашма», «Осмон яқин», «Дада», «Сабот», «Тоға» каби фильмларда турли даражадаги ролларни ижро этган.
Актёр Улуғбек Юнусов «Сардор» сериалида курсант Ўктам ролини ижро этган. «Сардор» сериали актёрнинг илк ролларидан бири ҳисобланади. Ундан ташқари «Қайтар дунё» сериалидаги Абдулла роли билан ҳам актёр мухлислар орасида машҳурликка эришган.
«Сардор» сериалида курсант Исмоил Қудратов ролини ижро этган Шомаҳмуд Шорасулов 31 ёшда бўлган. Дубляж режиссори бўлиб ишлаётган Шомаҳмуд Шорасулов «Сардор»даги ролининг катта қисми кесиб ташланганини ва шундан сўнг фильмларда роль ижро этмаганини маълум қилган эди.
Актёр Ўткир Менглиев «Сардор» сериалида старшина Эшжонов ролини ижро этган. Актёр ўшанда 23 ёшда бўлган. Ўткир Менглиев «Кичкина одамлар», «Тавба», «Адвокатлар», «Дада», «Зирапча», «Акажон, хизматингиздамиз», «Тақдирлар» каби бир қанча фильмларда турли даражадаги ролларни ижро этган.
Жамшид Арслоновни кино ихлосмадлари «Сардор» сериалидаги жанжалкаш курсант Ботир Розиқов роли билан танишади. У сериалда 22 ёшида суратга тушган. «Занжир», «Чемпионлик орзуси» сериаллари ҳамда «Отамдан қолган далалар» фильмида турли даражадаги ролларни ижро этган.
Ушбу мақола ёрдамида сизга хотиралар оламига шўнғишга ёрдамлаша олган бўлсак, ўз вазифамизни тўлиқ бажарган бўламиз. Тўпламни фильмни севиб томоша қилган яқинларингизга ҳам улашиб, уларни ҳайратда қолдиришни унутманг. Кейинги мақолаларда кўришгунча, ўзингизни эҳтиёт қилинг!
