Бренд дўконлари ва беш юлдузли меҳмонхоналарга эга энг йирик замонавий курорт барпо этилади
Машҳур хонанда ва тадбиркор Эмин Агаларов Ўзбекистондаги Чорвоқ сув омбори соҳилида «Sea Breeze» сайёҳлик марказини қуриш ниятида. Бу мамлакатдаги энг йирик замонавий курорт бўлиб, унда пляжлар, олий тоифали меҳмонхоналар, бизнес-класс турар-жой мажмуалари, машҳур брендлар дўконлари, клублар ва ресторанлар мавжуд бўлади. Агаларов шунга ўхшаш лойиҳани ўз ватани — Озарбайжон пойтахтида ҳам қураётгани маълум. Бу ҳақда Ўзбекистон президенти матбуот хизмати хабар берди.
Yangi yilga eng yaxshi sovg‘ani topdik. BU NIMA?
У ўзининг янги «Sea Breeze Uzbekistan» лойиҳасини президент Шавкат Мирзиёевга тақдим этди. Эмин Агаларовнинг ғоясига кўра, 500-700 гектар майдонни эгаллаган бу ноёб курорт нафақат дам олиш, балки йил давомида яшаш мумкин бўлган сайёҳлик марказига айланиши лозим.
«Шубҳасиз, энг жозибадор сайёҳлик марказларидан бири Бўстонлиқ туманидир. Чорвоқ сув омбори, дарёлар, қорли тоғлар ва гўзал ўрмонлар туфайли бу жой йилнинг исталган фаслида ҳордиқ чиқариш учун жуда қулай,» дея таъкидланди президент матбуот хизмати баёнотида.
Курорт ҳудудида йирик халқаро фестиваллар, концертлар ва маданий тадбирлар ўтказиш режалаштирилмоқда. Бундан ташқари, Тошкент яқинидаги сув омбори қўлтиғи устидан пиёдалар кўприги қурилади.
«Давлат раҳбари бу таклифни маъқуллаб, уни халқаро тажриба асосида лойиҳалаштириш ва босқичма-босқич қуриш зарурлигини таъкидлади», — дея қўшимча қилди матбуот хизмати.
Эслатиб ўтамиз, 2006 йилда россиялик тадбиркор Араз Агаларовнинг ўғли ва Озарбайжон президенти Илҳом Алиевнинг собиқ куёви Эмин Агаларов Боку яқинида, Каспий денгизи соҳилида «Sea Breeze» курорт-шаҳрини барпо этишни бошлаган эди. Дастлабки йилларда лойиҳа унчалик истиқболли кўринмаган бўлсада, саккиз йил ўтиб, бу курорт дунёдаги энг тез ривожланаётган дам олиш масканларидан бирига айланди.
