Электромобиллар учун утилизация йиғими оширилмоқда
Ишлаб чиқарилганига 3 йилдан ошмаган электромобиллар учун бу 45 млн сўмни, ундан ошган электромобиллар учун эса 78,75 млн сўмни ташкил этади.
Ўзбекистонда четдан олиб келинадиган электромобиллар учун утилизация йиғими оширилмоқда.
Бу ҳақда ҳукуматнинг 31 январь куни қабул қилинган «Электродвигателга эга бўлган транспорт воситалари аккумулятор батареяларини утилизация қилиш инфратузилмасини ташкил этиш ишларини молиялаштириш бўйича қўшимча чора-тадбирлар тўғрисида»ги қарорида келтирилган.
Ҳужжат билан электродвигателга эга бўлган транспорт воситалари (TIF TN коди 8703 80) га нисбатан утилизация йиғимининг янги миқдорлари белгиланади. Гибрид автомобиллар бундан мустасно.
Йиғимлар электромобилларнинг ишлаб чиқарилган йилига қараб, қуйидагича белгиланади:
- ишлаб чиқарилганига 3 йилдан ошмаган электромобиллар учун — БҲМнинг 120 баравари (45 млн сўм);
- ишлаб чиқарилганига 3 йилдан ошган — БҲМнинг 210 баравари (78,75 млн сўм).
Амалда утилизация йиғими миқдорлари ишлаб чиқарилганига уч йилдан ошмаган электромобиллар учун БҲМнинг 30 бараварини (11,25 млн сўм) ҳамда 3 йилдан ошганлари учун БҲМнинг 90 бараварини (33,75 млн сўм) ташкил этади.
Ҳужжат билан йиғимларнинг оширилган миқдорлари жорий йилнинг 1 майидан бошлаб кучга киради.
Иқтисодиёт ва молия вазирлиги Инвестициялар, саноат ва савдо вазирлиги билан биргаликда икки ой муддатда утилизация йиғимларини йиғиш ҳамда улардан самарали фойдаланиш тартибини ишлаб чиқиши керак.
