Иссиқкўлдаги тўртта панционат Ўзбекистонга берилди
Барча объектлар аввал эгалик қилган инвесторларга 49 йилга ижарага тақдим этилди.
Шавкат Мирзиёев Қирғизистон ҳукумати билан Иссиқкўлдаги курорт ва дам олиш масканлари тўғрисидаги келишувни тасдиқлади.
Битим Садир Жапаровнинг июль ойидаги Ўзбекистонга ташрифи доирасида имзоланганди. Унга кўра, Иссиқкўл соҳилидаги тўртта панционат аввал эгалик қилган ўзбекистонлик инвесторларга 49 йилга ижарага берилади.
Хусусан, қуйида рекреацион объектлар ва уларга мулк ҳуқуқини амалга оширувчи компаниялар келтирилган:
- «Дилором» — «Асакабанк»;
- «Олтин қумлар» — Тошкент механика заводи;
- «Роҳат» — «Ўзмиллийбанк»;
- қурилиши тугалланмаган «Бўстон» мажмуаси — «Ўзсаноатқурилишбанк».
Инвесторлар объектларни 3−4 юлдуз даражасида реконструкция қилишлари, шунингдек, ходимларининг камида 80%и Қирғизистон фуқароларидан иборат бўлиши керак. Ҳар бир объект учун тахминий инвестиция миқдори $15−20 млнни ташкил этади.
Битимнинг бажарилиши учун жавобгарлик Давлат активларини бошқариш агентлиги зиммасига юкланади. Ташқи ишлар вазирлигига Қирғизистон ҳукуматига шартноманинг кучга кириши учун тартиб-таомилларнинг бажарилиши тўғрисида билдиришнома юбориш топширилди.
