Ҳилол Насимов режиссёрлигидаги «Севдо» фильмининг тизери эълон қилинди
Режиссёр Ҳилол Насимов томонидан суратга олинган «Севдо» бадиий фильмининг тизери эълон қилинди. Бу ҳақда Кинематография агентлиги ахборот хизмати хабар берди.
Қайд этилишича, фильмда Прокуратура ходимларининг сўнгги йиллардаги фаолияти очиб берилади. Бундан ташқари, жамиятда учраб турадиган ғаразли кимсаларнинг кирдикорларини фош қилиш ҳақида сўз боради. Эстрада оламига ёрқин юлдуз каби кириб келган гўзал Севдо таҳдид ва маломатларга учрайди.
«Севдо» бадиий фильмининг тасвирга олиш ишлари Россиянинг Санкт-Петербург ҳамда Туркиянинг Истанбул ва Буюк Ада шаҳарларида бошланиб, Ўзбекистон ҳудудида ҳам бўлиб ўтган.
Фильмда Айсанем Юсупова, Самидхон Лутфуллаев, Нигора Каримбоева, Машхура Зулфиқорова, Меҳриддин Раҳматов, Рустам Каримов, Баҳшилло Фатуллаев, Боир Ҳолмирзаев, Фотиҳ Насимов, Одина Ғозиева, Шоҳруҳ Ҳамдамов, Даврон Каримов сингари актёр ва актрисалар роль ижро этган.
