01.10.2024
Тўлиқ метражли «Шелбилар оиласи» фильмининг суратга олиниши бошланди
Netflix «Шелбилар оиласи» фильмининг суратга олиш жараёнини расман йўлга қўйди. Айни номдаги сериалнинг тўлиқ метражли давоми тахминан 2025 йилда экранларга чиқиши кутилмоқда.
«Оскар» мукофоти соҳиби Киллиан Мёрфи Бирмингем гангстери Томас Шелби ролига қайтмоқда. Шунингдек, актёрлар сафида Барри Кеоган, Ребекка Фергюсон ва Тим Рот ҳам ўрин олган. Сюжетнинг аниқ тафсилотлари ҳозирча сир сақланмоқда.
Фильмни Том Харпер («Аэронавтлар») саҳналаштирмоқда. «Шелбилар»нинг асосчиси Стивен Найт яна сценарий ёзишга киришган. Картинанинг чиқиш санаси кейинроқ эълон қилинади. Сериал 2013 йилдан 2022 йилгача намойиш этилган ва олти мавсумдан иборат бўлган.
