Ўзбекистонда Binance крипто-биржаси расман иш бошлади
Coinpay билан ҳамкорликдаги платформада миллий валютада банк карталари орқали операцияларни амалга ошириш мумкин.
Ўзбекистонда криптоактивлар соҳасида хизмат кўрсатувчи Coinpay ва Binance қўшма платформаси иш бошлади. Бу ҳақда Coinpay маҳаллий криптобиржасининг матбуот хизмати хабар берди.
Лойиҳа Истиқболли лойиҳалар миллий агентлиги кўмагида ва Ўзбекистон қонунчилигига тўлиқ мувофиқ амалга оширилди. ИЛМА 2025 йил январь ойи ўрталарида крипто-биржалар ўртасидаги ҳамкорликни эълон қилди. Платформа Ўзбекистон ҳуқуқий тизимига расман интеграция қилинган биринчи шундай хизмат бўлди.
Янги хизмат фойдаланувчиларга банк карталари ва маҳаллий тўлов тизимлари орқали миллий валютадаги маблағларни тўлдириш ва ечиб олиш имконини беради. Бундан ташқари, фойдаланувчилар кенг кўламли Binance хизматларидан фойдаланиш имкониятига эга бўладилар.
Coinpay крипто-активлар билан операциялар фақат сайтдаги расмий ҳавола орқали амалга оширилиши кераклигини эслатиб ўтди. Ташқи p2p платформалари ёки бошқа хизматлардан фойдаланиш қонунчиликни бузиш ҳисобланади ва юридик жавобгарликка олиб келиши мумкин.
Компания, шунингдек, крипто-активлар билан боғлиқ операциялар уларнинг ўзгарувчанлиги туфайли юқори хатарлар билан боғлиқлигини таъкидлади. Фойдаланувчиларга савдоларни бошлашдан олдин рақамли активлар билан ишлашнинг ўзига хос хусусиятларини ўрганиш ва эҳтимолий молиявий хатарларни ҳисобга олиш тавсия этилади.
