Oʻzbekiston turizm sohasida “Eng yaxshi rivojlanayotgan yoʻnalish” mukofotiga sazovor boʻldi
Londonda boʻlib oʻtgan marosimda Oʻzbekiston nufuzli “Wanderlust Reader Travel Awards 2024” mukofotining “Eng yaxshi rivojlanayotgan yoʻnalish” nominatsiyasida gʻolib boʻldi.
Taqdirlash marosimi mashhur “Tate Modern” zamonaviy sanʼat galereyasida oʻtkazildi.
“Wanderlust Reader Travel Awards” mukofoti Wanderlust jurnali tomonidan oʻtkaziladigan yoʻnalishlar va turoperatorlar uchun nufuzli tanlov hisoblanadi. Jurnal xodimlari har bir mukofot toifasi uchun qisqa roʻyxatlarni yaratadilar va gʻoliblar oʻquvchilar tomonidan tanlanadi. Bu yil 3,6 milliondan ortiq ovoz berilgan.
1993-yilda tashkil etilgan “Wanderlust” Buyuk Britaniyadagi oʻquvchilar uchun yetakchi sayohat jurnallaridan biri hisoblanadi. “Wanderlust” yiliga deyarli 140 ming nusxada 10 ta son chiqaradi va uning veb-sayti har oy 1,2 million noyob oʻquvchilarni jalb qiladi.
