Toshkentda Porsche Studio ochildi. U qanday koʻrinishda?

30-sentyabr kuni Oʻzbekistonda birinchi Porsche markazi qurilishi boshlandi, noyabr oyi oxirida esa yangi va koʻp jihatdan noyob boʻlgan birinchi Porsche dilerlik studiyasining rasmiy ochilishi boʻlib oʻtadi.

Bu shunchaki avtosalon emas, u shunday innovatsion makonki, unda mijozlar bilan muloqot qilish va brend bilan tanishish uchun zamonaviy va qulay joyga aylanadi. Bu yerda premium avtomobillarni sotish gʻoyasi “Porsche” muhandislik sanʼati va madaniy qadriyatlarini namoyish etish tushunchasi bilan uygʻunlashadi.

Porsche Studio nafaqat Toshkentda, balki butun Markaziy Osiyoda yagona. Avval faqat Ostona va Olmatoda “Porsche” markazlari bor edi, ammo bu endi butunlay boshqa format. Studiya shahar markazida joylashgan boʻlib, shourum, mehmondoʻstlik va qulaylikning uygʻunlashgan koʻrinishini oʻzida mujassam etgan butik tasavvurini beradi.

Studiyadan farqli oʻlaroq, Porsche markazi koʻproq kengaytirilgan modellar assortimenti va texnik xizmat koʻrsatish markaziga ega boʻlgan yirik avtosalonga oʻxshaydi. Yangi Toshkent hududidagi toʻlaqonli dilerlik markazi qurilishi 2025-yilda yakunlanadi.

Uch qavatli studiyaga qaytaylik. Birinchi qavatda ikkita model — qordek oq rangli Porsche Taycan 4S Cross Turismo va koʻk rangli Porsche Macan T, kutish zonasi, bar va konfigurator mavjud boʻlib, ular yordamida har bir mehmon interaktiv tarzda modellar bilan tanishishi va oʻz xohishlariga koʻra avtomobil tanlashning noyob tajribasini his qilishi mumkin.

Studiya sizni “old money” muhitiga shoʻngʻitadi: chiziqlarning soddaligi, yorqin ranglar, bu brend falsafasini yana bir bor esga soladi — hashamat va nafosat. Shourumning oʻzi shahar tashqarisidagi uyni eslatadi, u juda shinam. Bu shunchaki avtosalon emas, balki mijozlar qulay sharoitda soʻnggi modellar bilan tanishishlari mumkin boʻlgan puxta oʻylangan dizayn makoni. Agar maxfiylik kerak boʻlsa, bu yerda suriladigan pardalar ham bor.

Studiyaning asosiy maqsadi — har bir tashrif buyuruvchi uchun imkon qadar qulay sharoit yaratish. Bu yerda mijozlar shaxsiy maslahatchi xizmatidan foydalanishlari mumkin. Maslahatchi nafaqat kerakli texnik koʻrsatkichlarga ega modelni tanlashga yordam beradi, balki rang, salon va texnologik imkoniyatlarni oʻz ichiga olgan toʻliq komplektatsiya ham tavsiya qiladi.

Avtomobil tanlashdan tashqari, maslahatchilar servis xizmatining nozik jihatlari haqida maʼlumot berishga va eng maqbul yechimlarni taklif etishga tayyor. Servis markazi binoning pastki qavatida joylashgan.

Ikkinchi qavatda Tashkent City bogʻiga qaragan katta panorama oynali muzokara xonalari va kutish zali joylashgan. Modellar bilan tanishishdan tashqari, mehmonlar brend tarixini chuqurroq bilishlari va uning falsafasini his qilishlari mumkin. Assortimentda taqdim etilgan kitoblar va fotosuratlar haqiqatan ham Porsche dunyosiga olib ketadi.