Turizm boshqarmasi BAA—O‘zbekiston o‘yiniga ketayotgan muxlislarni ogohlantirdi
Toshkent shahar Turizm boshqarmasi turistik firma va kompaniyalarga Birlashgan Arab Amirliklariga turlarni tashkil etishdan vaqtincha voz kechishni tavsiya qildi. Ushbu chora muxlislar sonining me’yordan oshishi va BAA rasmiylari tomonidan mamlakatga kirishni rad etish xavfi bilan bog‘liq ehtimoliy hodisalarning oldini olishga qaratilgan.
Kino va seriallarni 7 kun bepul tomosha qiling
Hujjatda qayd etilishicha, 5-iyun kuni Abu-Dabi shahrida futbol bo‘yicha jahon chempionati saralash bosqichi doirasida O‘zbekiston va BAA terma jamoalari o‘rtasida o‘yin bo‘lib o‘tadi. O‘yin arafasida mashhur sport blogerlari ijtimoiy tarmoqlarda terma jamoa muxlislari bilan birgalikda O‘zbekistondan 5 mingga yaqin muxlislarni tashkiliy ravishda olib kelish maqsadida keng ko‘lamli kampaniyani yo‘lga qo‘ydi.
Biroq, Abu-Dabidagi “Al Vahda” klubining uy stadioni bor-yo‘g‘i 12 ming tomoshabinga mo‘ljallangan. Osiyo futbol konfederatsiyasi talabiga ko‘ra, mezbon jamoa mehmon jamoa muxlislariga atigi 8 foiz o‘rin (960 o‘rin) taqdim etishi shart.
BAA huquq-tartibot idoralari O‘zbekiston fuqarolarini aeroportlarga kiritmaslik uchun ushbu omildan foydalanishi mumkinligi haqidagi ma’lumotni inobatga olgan holda, turistik firmalarga ko‘rsatilgan kunlarda sayyohlarni turpaketlar bilan BAAga yuborishdan tiyilish tavsiya etiladi.
O‘xshash mavzular
