Apple yangi iMacʼni taqdim etdi
Shu hafta Apple turli shakl va oʻlchamlardagi yangilangan kompyuterlarni namoyish qilmoqda. Birinchi boʻlib iMac monobloki taqdim etildi. Kutilganidek, qurilma sakkiz yoki oʻn yadroli M4 chipiga ega boʻldi. Biroq boshqa oʻzgarishlar ham mavjud.
50 nafar doʻstingizni taklif qiling va iPhone 16 Pro yutib oling
Operativ xotira hajmi 16 GB gacha koʻpaytirildi, shuningdek 32 GB versiyani ham buyurtma qilish imkoniyati bor. Yangi M4 chipi ayrim vazifalarni (oʻyinlar, rasmga ishlov berish) bajarishda M1 chipli oʻxshash iMacʼdan 2,1-marta tezroq ishlaydi. Toʻgʻri, M1 chip toʻrt yil oldin chiqarilgani sababli, quvvatning ikki barobar oshishi hayratlanarli emas. Appleʼning taʼkidlashicha, kompyuter kelgusida chiqadigan Civilization VII kabi “ogʻir” oʻyinlarni bemalol oʻynay oladi.
Avvalgidek, ekran diagonali 24 dyuym, tasvirning aniqlik darajasi 4.5K. Qoʻshimcha 200 dollarga displeyning “nano qoplama”sini xarid qilish mumkin.
10 yadroli chip versiyasiga ega kompyuter 120 Gs yangilanish tezligidagi 8K tashqi monitorni yoki har biri 60 Gs tezlikdagi ikkita 6K displeyni ulash imkonini beradi. Bu 8K/120 Gs tashqi monitor bilan ishlay oladigan birinchi Mac hisoblanadi. Biroq yaqin kunlarda xuddi shunday protsessorlarga ega Macbook Pro va Mac miniʼning taqdimoti kutilmoqda va bu qurilmalar ham, shubhasiz, xuddi shunday imkoniyatga ega boʻladi.
Narxlar 1299 dollardan boshlanadi, sotuvlar 8-noyabrdan boshlanadi.
