“Billning qotili” filmining kengaytirilgan versiyasi treyleri taqdim etildi
Lionsgate kompaniyasi Kventin Tarantinoning mashhur “Billning qotili” filmi asosida yaratilgan rejissorlik versiyasi — “Billning qotili: To‘liq qonli ish” (Kill Bill: The Whole Bloody Affair) treylerini namoyish etdi. Ushbu versiya mashhur dilogiyaning kengaytirilgan va to‘liq holati bo‘lib, Tarantino ijodining eng kutilgan nashrlaridan biri sanaladi.
Tarantino montaj qilgan bu variant ilk bor 2011-yilda namoyish etilgan, biroq keyinchalik arxivga topshirilgan edi. Endi esa u qayta tiklanib, to‘rt soatlik to‘liq film shaklida tomoshabinlarga taqdim etiladi. Yangi versiya birinchi va ikkinchi qismlarni birlashtirgan holda uzluksiz hikoya tarzida ko‘rsatiladi.
Filmning aniq davomiyligi 281 daqiqa, shu jumladan 15 daqiqalik tanaffus ham kiritilgan. Bundan tashqari, Lionsgate uni 35 mm va 70 mm kinolentalarda namoyish etishni rejalashtirmoqda. Kengaytirilgan versiyada ilgari bo‘lmagan 7 daqiqalik animatsion sahna ham mavjud bo‘ladi.
Uma Turman ijro etgan bu film 5-dekabr kuni AQShda qayta namoyishga chiqadi. “Billning qotili” syujeti sobiq yollanma qotil Beatriks Kiddoning o‘z oilasi o‘limi uchun qasos olish yo‘lidagi kurashini hikoya qiladi. Asarda, shuningdek, Lyusi Lyu, Maykl Madsen, Deril Xanna va Devid Kerradin kabi mashhur aktyorlar ishtirok etgan.
