Dam olish kunlari havo bulutli bo‘ladi
Dam olish kunlari O‘zbekistonning katta qismida havo bulutli bo‘lishi kutilmoqda. Ayrim joylarda yomg‘ir yog‘adi, harorat kechasi +5…+10, kunduzi +15…+17 darajagacha pasayadi.
Dam olish kunlari O‘zbekiston hududining katta qismida havo biroz bulutli bo‘lishi kutilmoqda. Ba’zi joylarda yomg‘ir yog‘adi, momaqaldiroq kuzatilishi mumkin, deya xabar berdi O‘zgidromet.
Faqat respublikaning shimoli-g‘arbiy hududlari — Qoraqalpog‘iston Respublikasi, Xorazm viloyati va Navoiy viloyatining shimolida yog‘ingarchilik kutilmaydi.
Havo harorati juma kuni +18…+21 darajagacha, shanba kuni +14…+17 darajagacha pasayishi davom etadi.
Yakshanba kuni faqat tog‘oldi va tog‘li hududlarda qisqa muddatli yomg‘ir yog‘ishi mumkin. O‘zbekistonning qolgan hududlarida quruq ob-havo kuzatiladi. Kechasi va kunduzi havo nisbatan salqin bo‘ladi, harorat kechasi +5…+10 darajagacha pasayadi, kunduzi esa quyosh nurlari havoni +20…+23 darajagacha isitadi.
Shamol 7−12 m/s tezlikda esadi, ayrim joylarda 15−20 m/s gacha kuchayadi. Respublikaning tog‘oldi va tog‘li hududlarida sel-suv toshqin hodisalari yuzaga kelishi mumkin.
Toshkent shahrida 18-aprel kechga tomon qisqa muddatli yomg‘ir yog‘ishi, momaqaldiroq bo‘lishi mumkin. Harorat +18…+20 daraja bo‘ladi. Shanba kuni kechasi va ertalab biroz yomg‘ir yog‘ishi mumkin, kunduzi yog‘ingarchilik kutilmaydi. Harorat kechasi +8…+10 daraja, kunduzi +15…+17 daraja bo‘ladi.
Yakshanba kuni yog‘ingarchilik kutilmaydi. Harorat kechasi +7…+9 daraja, kunduzi +18…+20 daraja bo‘ladi. Shamol sharqdan 5−10 m/s tezlikda esadi.
