Krishtianu Ronaldu: dunyoning eng badavlat futbolchisining mol-mulki, shaxsiy hayoti va karyerasi

Ronaldu tarjimayi holi

Tug‘ilgan sanasi: 1985-yil 5-fevral

Burj belgisi: Dalv

Tug‘ilgan joyi: Portugaliya

Oilaviy holati: juftlikda

Bo‘yi: 187 sm

Vazni: 83 kg

Portugaliyalik bo‘lishiga qaramasdan, Kristianu Ronalduni AQSH prezidenti Ronald Reygan sharafiga nomlashgan. Sportchi oilada to‘rtinchi farzand bo‘lib, uning bir akasi va ikki nafar singlisi bor. Mashhur futbolchi bolaligini alohida mehr bilan xotirlaydi va ota-onasi farzandlari uchun hamma ish qilishganini ta’kidlaydi. Eng esda qolarli sovg‘a esa otasi bayramda unga tuhfa etgan to‘p bo‘lgani. Aynan mana shu to‘p orqali taniqli futbolchining tarixi boshlangan.

Ronaldu 8 yoshida otasi ishlaydigan “Andorinya” jamoasida shug‘ullanishni boshlaydi. Keyinchalik mahalliy “Nacional” klubiga o‘tadi va bir necha yildan so‘ng “Sporting” yoshlar akademiyasida chiqish qiladi. Bir vaqtning o‘zida, hujumchi Portugaliya terma jamoasida o‘ynay boshlaydi va o‘smirlar o‘rtasidagi Yevropa chempionatida ishtirok etadi.

Salomatligidagi muammolarga qaramay (o‘smirlik davrida Ronalduda taxikardiya aniqlangan), u maydonni tark etmaydi. Futbolchining “Sport - bu  hayotimning mazmuni”, degan so‘zlari uning futbol uchun har qanday qiyinchiliklarga tayyor ekanligini isbotladi.

Ronaldu “Manchester Yunayted”da:

Balog‘at yoshiga yetganda Ronaldu Angliyaning “Manchester Yunayted” klubi vakillari nazariga tushadi. Tez orada futbolchining klubga o‘tishi amalga oshib, buning uchun inglizlar 15,9 million dollar miqdorida katta mablag‘ ajratishadi. Futbolchi 2003-yildan boshlab o‘sha yerda o‘ynadi.

Ronaldo darhol 7-raqamli sport kiyimiga ega bo‘ladi va bu uning o‘ziga xos belgisiga aylanadi. Qizig‘i shundaki, ilgari ushbu yetti raqamini Erik Kantonadan tortib Devid Bekxemgacha bo‘lgan mashhur futbolchilar kiyishgan edi. Bunday sharafni Ronaldu oqladi va jamoasi uchun qo‘lidan kelgan barcha ishni qildi: u hatto 2007-2008-yillarda Angliya chempionatida jamoasiga g‘alaba keltirgan eng yaxshi yosh futbolchi sifatida ham tan olindi.

“Manchester”ning eng yuqori maoshli o‘yinchisiga aylangan Krishtianu, jamoa sardori lavozimini egallab, yana bir imtiyozga erishdi. Yangi yetakchining birinchi o‘yini “Bolton Uonderers”ga qarshi bo‘ldi. Ushbu hayajonli o‘yinda portugaliyalik futbolchi bitta mavsumda 32 tadan ortiq gol urib, o‘z klubi rekordini yangiladi. U shu zahotiyoq “Oltin to‘p” va “Oltin butsa” mukofotlarini qo‘lga kiritdi.

Ronaldu “Real Madrid” va “Yuventus”da

Futbolchining yangi karyera bosqichi Ispaniyaning “Real” jamoasi bo‘ldi. Futbolchining ushbu jamoga ot‘ishi madridliklarga 104 million dollarga tushdi va Ronalduni dunyodagi eng qimmat futbolchiga aylantirdi. 

O‘sha paytda Krishtianuning “Barselona” yetakchisi Lionel Messi bilan raqobati alohida e’tiborga loyiq bo‘ldi. “Real” - “Barselona” futbol o‘yinlariga hozirgacha zamonaviy futbolning ikki eng kuchli futbolchisi orasidagi jang sifatida qaralishi bejiz emas. 

2018-yilda OAVda Krishtianu Ronaldu “Real”dan “Yuventus”ga o‘tishi haqidagi hayratlanarli va ishonchli yangilik tarqaldi. Transfer haqidagi qaror futbolchining o‘z talabi bilan qabul qilindi va uning o‘tishi 112 million dollarga tushdi. 

Shartnoma 2022-yilning iyuligacha imzolandi va Ronalduning yillik maoshi 30 million yevroni tashkil etdi. Bu Italiya futbol klublari tarixidagi eng qimmat transfer edi, ammo u bunga arzirdi: 2019-yilda Krishtianu UEFAning eng yaxshi to‘purari deb e’tirof etildi (mavsumda 21 ta gol urdi). 2020-yil boshida futbolchi Italiya chempionatining eng yaxshi o‘yinchisi deb tan olindi: o‘shanda Ronaldu to‘rtta o‘yinda yettita gol urgan edi.

Jurnalistlarning “Yuventus”dan ketishi haqidagi savollariga Ronaldu mujmal javob berdi. Ammo agar jamoa Chempionlar ligasiga “yorib o‘ta olmasa”, ketishini ham inkor etmadi.

2021-yilning yozida esa Krishtianuning shartnomani uzaytirish imkoniyati bilan 2 yilga “Manchester Yunayted”ga qaytgani ma’lum bo‘ldi.

Mavsum yakunlanishi bilan Ronalduda klubni tark etish istagi kuchaydi va bunga faqat Chempionlar ligasida o‘ynashni xohlayotganini, “Manchester” esa bu turnirga yo‘l ololmaganini sabab qilib ko‘rsatdi. Hamma Ronaldu endi qayerga ketishi haqida taxmin qilayotgan bir paytda, uning jamoadoshlari bundan xursandliklarini yashirishmasdi. Ko‘pchilik futbolchi kekkayib ketib, maydondagi do‘stona muhitni buzdi, deb hisoblar edi.

Krishtianu Ronaldu: hozirgi  Al-Nasr jamoasi

Ronalduning “Al-Nasr” klubi bilan shartnomasi 2022-yilda imzolandi. The Guardian nashrining xabar berishicha, o‘shanda Ronalduning maoshi rekord darajadagi 200 million yevroni tashkil etishi kerak edi.

Krishtianuning “Al-Nasr” safidagi ilk goli uning tug‘ilgan kunidan oldin - fevral oyida “Al-Fateh”ga qarshi o‘yinda amalga oshirildi. Natijada uning jamoasi mavsumni ikkinchi o‘rinda yakunladi va yoz oxirida Arab chempionlar kubogini qo‘lga kiritdi.

Ronalduning yangi rekordi kuz boshida, u faoliyatidagi 1000-mag‘lubiyatsiz o‘yinini o‘tkazganida o‘rnatildi. Oktyabr oyida Forbes jurnali Ronalduning eng ko‘p maosh oluvchi futbolchi maqomini qaytarib olganini ma’lum qildi (ungacha Messi uni ortda qoldirayotgan edi). O‘sha paytda Ronalduning yillik daromadi 260 million dollarni tashkil etdi.

2022-yilning oxirida Ronaldu o‘zining yubiley (1200-chi) o‘yinini o‘tkazdi va tarixda bunday ko‘rsatkichga erishgan 5-futbolchiga aylandi. Krishtianu yilni 2016-yildan buyon sodir bo‘lmagan  54 ta goli bilan yakunladi.

Ronaldu: davlati

Forbes ma’lumotlariga qaraganda, 2017-yilda Krishtianu 93 million dollar ishlab topgan va bu pulning uchdan bir qismini reklamalarda qatnashish orqali olgan. 2020-yilga kelib esa Ronalduning boyligi 1 milliard dollarga yetdi!

Bu pullarning bir qismini Krishtianu o‘zining sevimli mashg‘uloti - hashamatli mashinalari uchun sarflaydi. Ronaldu Bentley Continental, Bugatti Veyron, Lamborghini Aventador LP700-4 va boshqa avtomobillarda yuradi. Ko‘p yillar oldin sportchi hatto qizil Ferrarida avtohalokatga ham uchragan va o‘shanda hamkasblari unga o‘yinchoq pedalli avtomobilning kichik nusxasini sovg‘a qilishgan edi. Bu hazil Ronalduga yoqmagan va u namoyishkorona tarzda yangi Ferrari sotib olgandi.

Ronaldu o‘ziga Afrika deb nomlangan yaxta ham sotib olgan. Ulkan kema (uzunligi 492 m) unga 19 million dollarga tushdi. Unda u oilasi bilan birga sayohat qiladi.

Ronalduning Nike brendi bilan muddatsiz shartnomasi bor. Mutaxassislarning taxminlariga ko‘ra, hamkorlikdagi maosh rasmiy futbol maoshidan aslo kam emas. Shuningdek, hujumchining reklama portfelida Tag Heuer, Herbalife, Abbott Labs va boshqa kompaniyalar bilan shartnomalar mavjud.

2019-yilda Ronaldu Instagramda daromad darajasi bo‘yicha (boshqa futbolchilar orasida) yetakchiga aylandi. O‘shanda u ijtimoiy tarmoqdagi 49 ta post uchun 47,8 million dollar ishlab topganini yozishgandi!

Ronaldu 2024/2025-yilgi mavsumda rekord darajadagi daromadga ega bo‘ldi. Forbes hisobchilari ma’lumotlariga ko‘ra, futbolchi tez orada 220 million dollar ishlab topishi kutilmoqda, shuningdek, 65 million dollarni unga futbol maydonidan tashqaridagi faoliyati keltiradi. Umuman olganda, futbolchining 2024-yildagi umumiy daromadi 285 million dollarni tashkil etadi.

Shaxsiy hayoti: Sheyk bilan ishqiy munosabati va sirli farzandi

Ronalduning shaxsiy hayoti turli mish-mishlarga to‘la: unga deyarli har bir mashhur hurliqo bilan ishqiy sarguzasht nisbati berilgan!

Biroq ulardan eng ko‘p muhokamaga sabab bo‘lgan va uzoq davom etgan Ronaldu va Irina Sheyk o‘rtasidagi munosabatlar bo‘ladi. Juftlik bir necha yil davomida uchrashib, muxlislarni omma oldiga chiroyli chiqishlari, sayohatlardan olingan selfilar va to‘y rejalari bilan xursand qildi. Ammo to‘y bo‘lmadi. 2015-yilda rossiyalik supermodel va eng mashhur futbolchi ajrashdi. Bir muddat o‘tgach, Sheyk bu Ronalduning xiyonati tufayli sodir bo‘lganini ma’lum qildi.

Sheyk bilan ajrashgandan so‘ng, Ronaldu turli ishqiy sarguzashtlar bilan mashg‘ul bo‘ldi va kariyerasiga e’tibor qaratdi. 2010-yilning yozida esa u to‘satdan ota bo‘lganini e’lon qildi. Muxlislar hayratda qolishdi va futbolchining o‘g‘lini surrogat ona tug‘gan deb taxmin qilishdi. Chunki uning yonida na rasmiy, na yashirin hamrohi bor edi.

Ronaldu va Jorjina Rodriges

2016-yilning kuzida Ronaldu model Jorjina Rodriges bilan birga paydo bo‘ldi, qiz bilan o‘rtadagi yosh farqi (qiz futbolchidan 10 yosh kichik) hammani hayratda qoldirdi.

2017-yilning yozida muxlislar Ronalduning oilasiga yangi a’zolar qo‘shilganini bilib olishdi - yana surrogat ona egizaklarni dunyoga keltirdi. Chaqaloqlarga Metyu va Yeva deb ism qo‘yishdi va tez orada ular Ronalduning Instagram sahifasiga qo‘yilgan suratlarda paydo bo‘lishdi.

Surrogat onadan keyin Ronalduning ma’shuqasi Jorjina Rodriges ham farzandli bo‘ldi. Go‘zal qizaloq Alana-Martina dunyoga keldi. Ispaniya ommaviy axborot vositalari vaziyatni yanada qizdirish maqsadida futbolchining suyuklisi uning barcha farzandlarini tarbiyalashi va buning evaziga u oyiga 100 ming dollar atrofida maosh olishini aniqladilar. Ko‘ryapsizmi, har oy 100 ming dollarga yaqin-a!

2021-yilda Ronaldu muxlislari bilan bog‘lanib, yana ota bo‘lishga tayyorlanayotganini ma’lum qildi. U Jorjina bilan egizak - qiz va o‘g‘il farzand kutishayotgan edi. Ammo fojia yuz berdi: chaqaloqlardan biri tug‘ilish paytida vafot etdi. Qizaloq esa sog‘-salomat tug‘ildi. Shundan so‘ng juftlik jamoatchilik va jurnalistlardan ularni tinch qo‘yishlarini va yo‘qotishlarini boshdan kechirishlariga imkon berishlarini so‘radi. Hatto qirolicha Yelizaveta II ham oilaga hamdardlik bildirdi!

Ronaldu: yangiliklar

Ronaldu futbolda yutuqlarga erishishda davom etmoqda: Globe Soccer Awards 2024 da u Yaqin Sharqning eng yaxshi o‘yinchisi, shuningdek, 2023-yilda 54 ta gol urgan yilning eng yaxshi to‘purari sifatida taqdirlandi.

Futbolchiga yana bir mukofotni UEFA prezidenti Aleksandr Cheferin topshirdi. Ronaldu Chempionlar ligasi tarixidagi 140 ta gol urgan (183 ta o‘yinda) eng yaxshi to‘purar deb e’tirof etildi. 2024-yilning sentyabr oyida Krishtianu futbol sohasidagi faoliyatida 900-golini qayd etdi.

Krishtianu reklama kampaniyalarida ishtirok etishda davom etmoqda, shuningdek, ko‘p vaqtini oilasiga bag‘ishlaydi. Masalan, u Finlyandiyada o‘g‘li va turmush o‘rtog‘i bilan Rojdestvo ta’tilini qanday o‘tkazganini: bug‘u qo‘shilgan chanada sayr qilayotgan, muzdagi o‘yiqda cho‘milayotgan va Santa Klaus qarorgohida sayr qilayotgan holatlarini ko‘rsatdi.