Xivada “Qovun sayli” festivali boʻlib oʻtdi

Oʻzbekistonda agroturizm yoʻnalishini yanada rivojlantirish, mavjud imkoniyatlarni keng targʻib etgan holda bu orqali hududlarga sayyohlar oqimini oshirish maqsadida Turizm qoʻmitasi va Xorazm viloyati hokimligi bilan hamkorlikda koʻhna Xiva shahrida “Qovun sayli” festivali tashkil etildi.

Festival uchun “Polvon” darvoza oldi, “Alleya” maydonining 4 gektarida 60 ta pavilon tashkil qilinib, Qoraqalpogʻiston Respublikasi, viloyatlar va Toshkent shahar hokimliklari, shuningdek, Xorazm viloyatidagi 13 ta shahar va tuman hokimliklari, oʻz hududlarida yetishtirilgan meva-sabzavotlar, poliz ekinlari qovun mahsulotlarining “Gurvak”, “Qilichboy beshak”, “Qariqiz”, “Tuya qovun”, “Toʻyona”, “Ola zamcha”, “Xorazm oq novvoti”, “Koʻk gulobi”, “Boʻrikalla” kabi mahalliy qovunlarning 125 ga yaqin navlari namoyishi hamda hunarmandchilik mahsulotlari bilan ishtirok etdi.

Festival yakunida gʻolib va sovrindorlar aniqlandi. Unga koʻra, Xorazm viloyati Yangibozor tumani gran-pri sohibiga aylandi (yutuq — Tracker). Birinchi oʻrin  Urganch shahriga (yutuq — Onix), ikkinchi oʻrin Xiva tumaniga (yutuq — Damas), uchinchi oʻrin esa Urganch tumani, Xiva shahri va Qoʻshkoʻpir tumanlariga (yutuq har biriga — mototsikl) nasib qildi.

Shuningdek, “Qovunni qayta ishlash va saqlaganligi uchun”, “Qadimiy Xorazm navlarini tiklash va yangi innovatsion texnologiyalar joriy qilganligi uchun”, “Qovunchilikda eng yuqori rentabellikka va eksportbop qovun yetishtirgani uchun”, “Eng shirin ekologik qovun yetishtirganligi uchun” nominatsiyalari boʻyicha ham gʻoliblar aniqlandi va taqdirlandi.

Tadbir tufayli Xorazm viloyatiga shu kunlarda 30 mingdan ortiq xorijiy mehmonlar va 400 mingga yaqin mahalliy sayyohlar tashrif buyurdi. Maʼlumot uchun, bu kabi festivallar ichki va tashqi turizmni yanada rivojlantirishga, turistlar soni oshishiga xizmat qiladi.