Абдуқодир Ҳусановнинг нархи Австралия, Қатар ва БАА терма жамоаларидан қимматроқ
Ўзбекистон миллий терма жамоаси ва «Ланс» клуби ҳимоячиси Абдуқодир Ҳусанов «Манчестер Сити» клубига ўтмоқда. Трансфер учун тўланадиган 40 миллион евро уни Осиёнинг энг кучли жамоалари футболчиларининг умумий қийматидан ҳам қимматроқ қилади.
Турли ишончли манбаларнинг хабар беришича, клуб раҳбарияти ва футболчи ўртасида келишувга эришилган бўлиб, Абдуқодир яқин кунларда «Манчестер Сити»да тиббий кўрикдан ўтади.
Футболчи учун тўланадиган 40 миллион евро кўплаб Осиё терма жамоаларининг умумий қийматидан юқори. Хусусан, Австралия терма жамоаси таркибининг қиймати 39 миллион евро, БАА (35 миллион евро), Қатар (18,9 миллион евро) ва Саудия Арабистони (18,8 миллион евро) терма жамоалариникидан ортиқ.
Таъкидлаш жоизки, илгари кўп ҳолларда фақат Япония ва Жанубий Кореялик футболчилар учун катта миқдорда пул тўланар эди. Бироқ сўнгги пайтларда ўзбекистонлик футболчилар ҳам Европа футболида оммалаша бошлади. Эслатиб ўтамиз, аввалроқ Элдор Шомуродов учун «Рома» деярли 18 миллион евро тўлаган эди.
