Сенат скутер ва самокат ҳайдовчилари учун жарималар жорий этишни маъқуллади
Шунингдек, йўл-патруль хизмати ходимларининг қоидабузарга жойнинг ўзида жарима қўллаш ваколати бекор қилинади.
20 сентябрь куни Сенатнинг 57-ялпи мажлисида Маъмурий жавобгарлик тўғрисидаги кодексига ўзгартириш ва қўшимчалар киритиш ҳақидаги қонун лойиҳаси кўриб чиқилди.
Хусусан, мазкури кодекснинг 171-моддаси олтинчи қисм билан тўлдирилиб, унда фото ва видео қайд этиш техника воситалари орқали аниқланган ҳуқуқбузарликлар ҳақида ўз вақтида фуқарони хабардор этиш ва чора кўриш билан боғлиқ янги норма киритилмоқда.
Бунда йўл ҳаракати қоидалари бузилишига оид маълумотлар 48 соат ичида ЙҲХХга юборилмаса ҳайдовчи маъмурий жавобгарликка тортилмайди.
Шунингдек, тез тиббий ёрдам ҳамда ёнғин-қутқарув бўлинмалари транспорт воситалари катта тезликда ёки йўл белгиларига риоя этмай ҳаракатланиши билан боғлиқ ҳолатлар автоматлаштирилган фото ва видео техник воситалар орқали қайд этилади.
